പട്‌ന: ബിഹാറില്‍ ബി.ജെ.പി ജെ.ഡി.യു നേതൃത്വത്തിലുള്ള എന്‍.ഡി.എ സഖ്യത്തിന് അധികാരത്തുടര്‍ച്ച പ്രവചിച്ച് എക്‌സിറ്റ് പോള്‍ സര്‍വേകള്‍. നിതീഷ് കുമാറിന്റെ നേതൃത്വത്തില്‍ എന്‍ഡിഎ മുന്നണി അധികാരത്തില്‍ തുടരുമെന്നാണ് വിവിധ ഏജന്‍സികളുടെ എക്‌സിറ്റ് പോളുകള്‍ പ്രവചിക്കുന്നത്. 130ലേറെ സീറ്റുകളാണ് എല്ലാ എക്‌സിറ്റ് പോളുകളും എന്‍ഡിഎ സഖ്യത്തിന് പ്രവചിക്കുന്നത്. 243 അംഗ നിയമസഭയില്‍ 122 സീറ്റാണ് കേവലഭൂരിപക്ഷത്തിന് ആവശ്യം.

ദൈനിക് ഭാസ്‌കര്‍, മാട്രിസ്, പീപ്ള്‍സ് ഇന്‍സൈറ്റ്, പീപ്ള്‍സ് പള്‍സ് എന്നീ നാലു എക്‌സിറ്റ് പോള്‍ ഫലങ്ങളാണ് സംസ്ഥാനത്ത് എന്‍.ഡി.എക്ക് അധികാരത്തുടര്‍ച്ച പ്രവചിച്ചത്. അതേസമയം, പ്രശാന്ത് കിഷോറിന്റെ ജന്‍ സുരാജ് പാര്‍ട്ടിക്ക് നിയമസഭ തെരഞ്ഞെടുപ്പില്‍ കാര്യമായ പ്രതിഫലനമുണ്ടാക്കാന്‍ സാധിക്കില്ലെന്നും വിലയിരുത്തലുകളുണ്ട്.

എന്‍.ഡി.എക്ക് 145-160 സീറ്റുകള്‍ ലഭിക്കുമെന്നാണ് ദൈനിക് ഭാസ്‌കറിന്റെ പ്രവചനം. മഹാസഖ്യത്തിന് 73-91 സീറ്റുകള്‍ വരെ ലഭിക്കാമെന്നും അവര്‍ വിലിരുത്തുന്നു. ജന്‍സൂരജിന് 0-3 ഉം മറ്റ് പാര്‍ട്ടികള്‍ക്ക് 5-10 വരെ സീറ്റുകള്‍ ലഭിച്ചേക്കാമെന്നും കണക്കുകൂട്ടുന്നുണ്ട്. എന്‍.ഡി.എക്ക് 147-167 സീറ്റുകള്‍ ലഭിച്ചേക്കാമെന്നാണ് മാട്രിസിന്റെ സര്‍വേ ഫലം. മഹാസഖ്യത്തിന് 70-90 സീറ്റുകള്‍ ലഭിക്കുമെന്നും അവര്‍ പ്രവചിക്കുന്നു. ജന്‍ സുരാജ് പാര്‍ട്ടി 0-2ഉം മറ്റ് പാര്‍ട്ടികള്‍ക്ക് 2-8 ഉം സീറ്റുകള്‍ കിട്ടുമെന്നാണ് കരുതുന്നത്. പീപ്ള്‍സ് ഇന്‍സൈറ്റിന്റെ കണക്കനുസരിച്ച് എന്‍.ഡി.എക്ക് 133-148 വരെ സീറ്റുകള്‍ ലഭിക്കും. മഹാസഖ്യത്തിന് 87-102ഉം. ജന്‍സുരാജിന് 0-2, മറ്റുള്ളവര്‍ 3-6 എന്നിങ്ങനെയാണ് കണക്ക്. എന്‍.ഡി.എക്ക് 133-159 സീറ്റുകളും മഹാസഖ്യത്തിന് 75-101 സീറ്റുകളും ജന്‍സുരാജിന് 0-5ഉം മറ്റുള്ളവര്‍ക്ക് 2-8ഉം സീറ്റുകളാണ് പീപ്ള്‍സ് പള്‍സ് പ്രവചിക്കുന്നത്.