റിയാദ്: RSC സൗദി ഈസ്റ്റിന്റെ 'KNOWTECH 3.0' ശാസ്ത്ര-സാങ്കേതിക പ്രദര്‍ശനവും വിജ്ഞാന സംഗമവും നാളെ (നവംബര്‍ 14, വെള്ളിയാഴ്ച) റിയാദിലെ ഗ്രേറ്റ് ഇന്റര്‍നാഷണല്‍ സ്‌കൂളില്‍ നടക്കും. ഉച്ചയ്ക്ക് 2.00 മുതല്‍ രാത്രി 9.00 വരെ നീളുന്ന ഈ പ്രദര്‍ശനം, വിജ്ഞാനവും സാങ്കേതിക വിദ്യയും ഒരുമിച്ച് ചേരുന്ന സജീവമായ വേദിയായിട്ടാണ് രൂപകല്‍പ്പന ചെയ്തിരിക്കുന്നത്. വേഗത്തില്‍ മാറുന്ന ഈ ലോകത്തില്‍, സമൂഹത്തിന്റെ നിലനില്‍പ്പിനും പുരോഗതിക്കും വിജ്ഞാനവും സാങ്കേതികവിദ്യയും എങ്ങനെ വഴി തുറക്കുമെന്ന് ഈ വേദിയിലൂടെ ഓര്‍മ്മിപ്പിക്കുകയാണ് സംഘാടകര്‍.

വിദ്യാര്‍ത്ഥികള്‍, അധ്യാപകര്‍, പ്രൊഫഷണലുകള്‍, സ്റ്റാര്‍ട്ടപ്പ് സംരംഭകര്‍ എന്നിവര്‍ക്ക് തങ്ങളുടെ സൃഷ്ടിപരമായ ആശയങ്ങളും ആധുനിക സാങ്കേതിക വിദ്യകളും പൊതുസമൂഹത്തിന് മുന്നില്‍ പ്രദര്‍ശിപ്പിക്കാനുള്ള സുവര്‍ണ്ണാവസരമാണ് KNOWTECH 3.0 ഒരുക്കുന്നത്. പുതിയ കണ്ടുപിടുത്തങ്ങളെയും സാങ്കേതിക മുന്നേറ്റങ്ങളെയും പൊതുജനങ്ങള്‍ക്ക് അടുത്തറിയാനും പഠിക്കാനും ഇത് സഹായിക്കും. അറിവ് തേടുന്നവര്‍ക്കും സാങ്കേതിക മേഖലയില്‍ താല്‍പ്പര്യമുള്ളവര്‍ക്കും ഒരുപോലെ പ്രയോജനകരമാകുന്ന വിജ്ഞാനസംഗമമാകും KNOWTECH 3.0.