ജിദ്ദ: ശാസ്ത്ര സാങ്കേതിക രംഗത്തെ നൂതന മാറ്റങ്ങളും അറിവുകളും പകര്‍ന്നുനല്‍കി രിസാല സ്റ്റഡി സര്‍ക്കിള്‍ (ആര്‍.എസ്.സി) സംഘടിപ്പിക്കുന്ന 'നോട്ടെക് 3.0' (KnowTech) എക്സ്പോയ്ക്ക് ജിദ്ദയില്‍ തുടക്കമായി. അല്‍ മവാരിദ് ഇന്റര്‍നാഷണല്‍ സ്‌കൂളില്‍ നടക്കുന്ന സാങ്കേതിക മേള അല്‍ മവാരിദ് സ്‌കൂള്‍ പ്രിന്‍സിപ്പല്‍ അബ്ദുറഷീദ് ഉദ്ഘാടനം ചെയ്തു.

സമൂഹത്തെ ആനുകാലിക സാങ്കേതിക മാറ്റങ്ങള്‍ക്കൊപ്പം സഞ്ചരിക്കാന്‍ സഹായിക്കുന്നതാണ് നോട്ടെക് എന്നും, ശാസ്ത്ര ലോകത്തെ പുതിയ ചിന്തകളിലേക്കുള്ള വാതായനങ്ങള്‍ യുവതലമുറയ്ക്ക് മുന്നില്‍ തുറന്നിടാന്‍ ഈ മേളയ്ക്ക് സാധിക്കുമെന്നും അദ്ദേഹം അഭിപ്രായപ്പെട്ടു. സയ്യിദ് സൈനുല്‍ ആബിദീന്‍ തങ്ങള്‍, യഹിയ ഖലീല്‍ നൂറാനി, വിവിധ സ്‌കൂള്‍ പ്രിന്‍സിപ്പല്‍മാര്‍ സന്നിഹിതരായിരുന്നു. സൈന്‍ ഇന്‍ സെഷന്‍ ആര്‍ എസ് സി ഗ്ലോബല്‍ വിസ്ഡം സെക്രട്ടറി ഫസീന്‍ അഹമ്മദ് നേതൃത്വം നല്‍കി.

ലെജന്‍ഡറി ടോക്ക്, ഐ-ടോക്ക്, സയന്റിഫിക് എക്‌സ്‌പോ, ടെക് എക്‌സ്‌പോ, ടെക്നോവ, നെക്സ്റ്റര്‍, ഡി.ഐ.വൈ (DIY) ലാബ്, മേക്കേഴ്‌സ് മാര്‍ക്കറ്റ് തുടങ്ങി വൈവിധ്യമാര്‍ന്ന പവലിയനുകളിലായി നിരവധി പരിപാടികളാണ് എക്‌സ്‌പോയില്‍ നടക്കുന്നത്. മേള ഇന്ന് രാത്രി 9 മണിക്ക് സമാപിക്കും.