റിയാദ്: ശാസ്ത്രാഭിരുചിയും സാങ്കേതിക മികവും വളര്ത്തിക്കൊണ്ടുവരിക എന്ന ലക്ഷ്യത്തോടെ അലിഫ് ഇന്റര്നാഷണല് സ്കൂളില് സംഘടിപ്പിച്ചുവരുന്ന അലിഫ് എക്സ്പോ സമാപിച്ചു. 'എക്സ്പിരിമെന്റല് 25' എന്ന പേരില് സയന്സ് എക്സ്പോയും 'ബൈറ്റ്ബാഷ്, എന്ന നാമത്തില് ഡിജിറ്റല് ഫെസ്റ്റും വൈവിധ്യമാര്ന്ന കലാവിഷ്കാരങ്ങള് നിറഞ്ഞ ആര്ട്ട് ഗാലറിയും ചേര്ന്നതായിരുന്നു അലിഫ് എക്സ്പോ '25.
പ്രോജക്ടുകളിലെ വൈവിധ്യം കൊണ്ടും ജനപങ്കാളിത്തം കൊണ്ടും അലിഫ് എക്സ്പോ ശ്രദ്ധേയമായി. 'എക്സ്പിരിമെന്റല് 25' കിംഗ് സൗദി യൂണിവേഴ്സിറ്റിയിലെ കെമിസ്ട്രി പ്രൊഫസര് സയ്യിദ് ഫാറൂഖ് ആദില് ഉദ്ഘാടനം ചെയ്തു. 'ബൈറ്റ് ബാഷ്' ടെക്പ്രോക്സിമ എക്സിക്യൂട്ടീവ് ഡയറക്ടര് ശൈഖ് സലീം അബ്ദുറഹ്മാനും ആര്ട്ട് ഗാലറി ഓറക്ക്ള് ഇന്വെസ്റ്റ്മെന്റ് അഡൈ്വസറി ഡയറക്ടര് മുഹമ്മദ് അഹ്മദും ഉദ്ഘാടനം ചെയ്തു.
ജലസേചന പദ്ധതികള്, സോളാര്, ബഹിരാകാശ ഗവേഷണം, ചാന്ദ്രയാന് തുടങ്ങിയ പ്രോജക്ടുകള് ഏറെ കൗതുകമുണര്ത്തി. സാങ്കേതിക രംഗത്തെ ത്വരിത ഗതിയിലുള്ള വളര്ച്ചയെ അടയാളപ്പെടുത്തുന്ന ഏറ്റവും പുതിയ കാഴ്ചകളാണ് ഡിജിറ്റല് ഫെസ്റ്റിലൊരുക്കിയത്.വിഷ്വല് കോഡിംഗ്, റോബോട്ടിക്സ്, ഗെയിംസ്, ഡോക്യുമെന്ററി പ്രസന്റേഷന്, വെബ് ഡിസൈനിങ്, എ ഐ തുടങ്ങിയവ ഉള്പ്പെടെ ഇരുനൂറ്റി അമ്പതോളം പ്രോജക്റ്റുകളാണ് അലിഫ് എക്സ്പോയില് പ്രദര്ശനത്തിനുണ്ടായിരുന്നത്.
പരിപാടിക്ക് നേതൃത്വം നല്കിയ മുഹമ്മദ് നിസാമുദ്ദീന്, ആയിഷ ബാനു, സുമയ്യ ശമീര് (ഡിപ്പാര്ട്ട്മെന്റ് ഓഫ് സയന്സ്), മുഹമ്മദ് രിഫാദ്, ജുമൈല ബഷീര്(ഡിപ്പാര്ട്ട്മെന്റ് ഓഫ് ഐ ടി), ഉഷ (ഡിപ്പാര്ട്ട്മെന്റ് ഓഫ് ആര്ട്ട് ആന്റ് ക്രാഫ്റ്റ്) എന്നിവരെ അലിഫ് ഗ്രൂപ്പ് ഓഫ് സ്കൂള്സ് സി ഇ ഒ ലുഖ്മാന് അഹ്മദ്, പ്രിന്സിപ്പല് മുഹമ്മദ് മുസ്തഫ എന്നിവര് അഭിനന്ദിച്ചു. ഹെഡ്മാസ്റ്റര് നൗഷാദ് നാലകത്ത്, ഹെഡ്മിസ്ട്രസ് ഫാത്തിമ ഖൈറുന്നിസ, അഡ്മിനിസ്ട്രേറ്റര് അലി ബുഖാരി എന്നിവര് സംബന്ധിച്ചു.
Related News
