കോഴിക്കോട്: കോഴിക്കോട് നിന്നും ഷാര്‍ജയിലേക്ക് പുറപ്പെട്ട എയര്‍ അറേബ്യ വിമാനം ഫുജൈറ വിമാനത്താവളത്തില്‍ കുടുങ്ങിക്കിടക്കുന്നതായി പരാതി. ഇന്ന് പുലര്‍ച്ചെ 3.30-ന് കോഴിക്കോട് അന്താരാഷ്ട്ര വിമാനത്താവളത്തില്‍ നിന്ന് പുറപ്പെട്ട വിമാനത്തിലെ 161 യാത്രക്കാരാണ് ദുരിതത്തിലായിരിക്കുന്നത്. ഷാര്‍ജയില്‍ എത്തേണ്ടിയിരുന്ന വിമാനം, കൃത്യമായ കാരണം വ്യക്തമാക്കാതെ ഫുജൈറ എയര്‍പോര്‍ട്ടില്‍ അടിയന്തരമായി ഇറക്കുകയായിരുന്നു.

വിമാനം ഫുജൈറയില്‍ ഇറങ്ങി മണിക്കൂറുകള്‍ പിന്നിട്ടിട്ടും യാത്ര പുനരാരംഭിക്കുന്നതിനെക്കുറിച്ച് വ്യക്തമായ അറിയിപ്പുകളൊന്നും ലഭിച്ചിട്ടില്ലെന്ന് യാത്രക്കാര്‍ ആരോപിച്ചു. യാത്ര വൈകുന്നത് സംബന്ധിച്ച് വിമാനക്കമ്പനി മുന്‍കൂട്ടി യാതൊരു മുന്നറിയിപ്പും നല്‍കിയില്ലെന്നും അവര്‍ പരാതിപ്പെട്ടു.

വിമാനജീവനക്കാര്‍ നല്‍കുന്ന വിവരം അനുസരിച്ച്, വിമാനം വൈകാന്‍ കാരണം ജീവനക്കാരുടെ ഷിഫ്റ്റ് സംബന്ധിച്ച പ്രശ്‌നങ്ങളാണ്. നിലവില്‍ യാത്ര എപ്പോള്‍ പുനരാരംഭിക്കുമെന്നോ, മറ്റ് യാത്രാക്രമീകരണങ്ങള്‍ എന്തായിരിക്കുമെന്നോ ഉള്ള ഔദ്യോഗിക വിവരങ്ങള്‍ വിമാനത്താവള അധികൃതരോ എയര്‍ അറേബ്യയോ ഇതുവരെ യാത്രക്കാര്‍ക്ക് കൈമാറിയിട്ടില്ല. പുലര്‍ച്ചെ പുറപ്പെട്ട യാത്രക്കാര്‍ക്ക് മണിക്കൂറുകളായി ഫുജൈറ വിമാനത്താവളത്തില്‍ കാത്തിരിക്കേണ്ടിവന്നത് വലിയ ബുദ്ധിമുട്ടുണ്ടാക്കിയിരിക്കുകയാണ്.