കുവൈത്ത് സിറ്റി: കുവൈത്തിലെ പ്രവാസി മലയാളികളെയും നാട്ടുകാരെയും കണ്ണീരിലാഴ്ത്തി, ഭക്ഷണം തൊണ്ടയില്‍ കുടുങ്ങി ചികിത്സയിലായിരുന്ന പിഞ്ചുകുഞ്ഞ് മരണത്തിന് കീഴടങ്ങി. കൊയിലാണ്ടി സ്വദേശി ജവാദിന്റെയും ജംഷിനയുടെയും മകന്‍ എസ്രാന്‍ ജവാദ് (ഒമ്പതു മാസം) ആണ് മരിച്ചത്.

ഭക്ഷണം കഴിക്കുന്നതിനിടെ തൊണ്ടയില്‍ കുടുങ്ങിയതിനെ തുടര്‍ന്ന് കഴിഞ്ഞ രണ്ടു ദിവസമായി കുവൈത്തിലെ അദാന്‍ ആശുപത്രിയില്‍ ചികിത്സയിലായിരുന്നു എസ്രാന്‍ ജവാദ്. ഡോക്ടര്‍മാരുടെ തീവ്രശ്രമങ്ങള്‍ക്കിടയിലും കുഞ്ഞിന്റെ ജീവന്‍ രക്ഷിക്കാനായില്ല. കൊയിലാണ്ടി നഗരസഭയിലെ പ്രതിപക്ഷ നേതാവും മുസ്ലിം ലീഗ് മണ്ഡലം പ്രസിഡന്റുമായ വി.പി. ഇബ്രാഹിം കുട്ടിയുടെ പേരക്കുട്ടിയാണ് എസ്രാന്‍. മയ്യിത്ത് കുവൈത്തില്‍ തന്നെ ഖബറടക്കുമെന്ന് ബന്ധപ്പെട്ടവര്‍ അറിയിച്ചു.