ലണ്ടന്‍: ബ്രിട്ടനില്‍ സ്ഥിരതാമസത്തിനുള്ള അനുമതി (Indefinite Leave to Remain - ILR) നേടാനുള്ള യോഗ്യതാ കാലാവധി ഇരട്ടിയാക്കാനുള്ള നിര്‍ദ്ദേശം സര്‍ക്കാര്‍ പാര്‍ലമെന്റില്‍ അവതരിപ്പിച്ചു. പുതിയ നയം ഇന്ത്യക്കാര്‍ ഉള്‍പ്പെടെയുള്ള രാജ്യാന്തര കുടിയേറ്റക്കാര്‍ക്ക് കടുത്ത തിരിച്ചടിയാകും.

നിലവില്‍ അഞ്ചു വര്‍ഷത്തെ താമസം പൂര്‍ത്തിയാക്കിയാല്‍ ഐഎല്‍ആര്‍-ന് അപേക്ഷിക്കാമായിരുന്നു. എന്നാല്‍ പുതിയ ഭേദഗതി പ്രകാരം, ചില വിഭാഗക്കാര്‍ക്ക് ഇനി വളരെ കൂടുതല്‍ കാലം കാത്തിരിക്കേണ്ടി വരും: കുറഞ്ഞ ശമ്പളമുള്ള ജോലിക്കാര്‍ക്ക് ഐഎല്‍ആര്‍ ലഭിക്കാന്‍ ഇനി 15 വര്‍ഷം വരെ കാത്തിരിക്കേണ്ടി വരും. നികുതിദായകരുടെ പണം കൊണ്ടുള്ള ആനുകൂല്യങ്ങള്‍ സ്വീകരിക്കുന്ന കുടിയേറ്റക്കാര്‍ 20 വര്‍ഷം വരെ കാത്തിരിക്കണം.

അതേസമയം, രാജ്യത്തിന് ആവശ്യമായ വിദഗ്ദ്ധര്‍ക്ക് ആശ്വാസം നല്‍കിക്കൊണ്ട് 'ഫാസ്റ്റ് ട്രാക്ക്' ഐഎല്‍ആര്‍ സൗകര്യം നിലനിര്‍ത്തും. എന്‍.എച്ച്.എസ്. ഡോക്ടര്‍മാര്‍, നഴ്‌സുമാര്‍, മുന്‍നിര മേഖലകളിലെ വിദഗ്ദ്ധര്‍, ഉയര്‍ന്ന വരുമാനക്കാര്‍, സംരംഭകര്‍ എന്നിവര്‍ക്ക് അഞ്ചു വര്‍ഷത്തിലോ അതില്‍ കുറഞ്ഞ കാലാവധിയിലോ സ്ഥിരതാമസത്തിന് അപേക്ഷിക്കാന്‍ സാധിക്കും. ഈ സുപ്രധാന നിയമമാറ്റം ബ്രിട്ടനിലെ കുടിയേറ്റ നയങ്ങളില്‍ വലിയ സ്വാധീനം ചെലുത്തുമെന്നാണ് വിലയിരുത്തല്‍.