ജിദ്ദ: കോഴിക്കോടിനും യു.എ.ഇക്കും ഒമാനും പിന്നാലെ സൗദി അറേബ്യയിലും ദം ദം ബിരിയാണിയുടെ രുചിക്കൂട്ട് തയാറാകുന്നു. സൗദിയിലെ വിവിധ നഗരങ്ങളിലായി നടക്കുന്ന 'വിജയ് ദം ദം ബിരിയാണി' പാചക മത്സരത്തിന്റെ രജിസ്‌ട്രേഷന്‍ ആരംഭിച്ചു. ജിദ്ദ ഹോട്ടല്‍ ഗലേറിയയില്‍ നടന്ന ചടങ്ങിലാണ് മത്സരത്തിന്റെ ലോഗോ പ്രകാശനവും പ്രഖ്യാപനവും നടന്നത്.
ഗള്‍ഫ് മാധ്യമവും മീ ഫ്രണ്ടും ചേര്‍ന്ന അവതരിപ്പിക്കുന്ന ദംദം ബിരിയാണി മത്സരം നാല് മാസം നീളും. സൗദിയിലെ ചെറുനഗരങ്ങളിടലക്കം പ്രാഥമിക മത്സരങ്ങള്‍ നടക്കും. ജിദ്ദ, ദമാം റിയാദ് എന്നിവിടങ്ങളില്‍ സെമിഫൈനലും മെയ് ഒന്നിന് റിയാദില്‍ ഫൈനലും അരങ്ങേറും. ഷെഫും ടി.വി അവതാരകനുമായ രാജ് കലേഷാണ് മത്സരത്തിന്റെ ബ്രാന്‍ഡ് അംബാസഡര്‍.

വീട്ടമ്മമാര്‍ മുതല്‍ പാചകം ഹോബിയാക്കിയ ആര്‍ക്കും ലിംഗഭേദമന്യേ മത്സരിക്കാന്‍ സാധിക്കുന്ന ജനറല്‍ കാറ്റഗറിയില്‍ മികച്ച ബിരിയാണി തയ്യാറാക്കുന്നയാള്‍ 'സൗദി ബിരിയാണി ദം സ്റ്റാര്‍' എന്ന പേരിലുള്ള പുരസ്‌കാരം നേടും. പ്രവാസ ലോകത്തെ ബാച്ചിലര്‍ മുറികളില്‍ ഒതുങ്ങിപ്പോയ പാചക വിദഗ്ധരെ കണ്ടെത്താനുള്ള മത്സരം ഇത്തവണത്തെ സവിശേഷതയാണ്. കുറഞ്ഞ ചേരുവകള്‍ ഉപയോഗിച്ച് ലളിതമായ രീതിയില്‍ രുചികരമായ ബിരിയാണി തയ്യാറാക്കാന്‍ സാധിക്കുന്നവര്‍ക്ക് മാത്രമായി നടക്കുന്ന ഈ മത്സരത്തില്‍ തിരഞ്ഞെടുക്കുന്ന മികച്ച ബിരിയാണി പാചകക്കാരന്‍ 'വിജയ് ബിരിയാണി രാജ' എന്ന പേരിലുള്ള പുരസ്‌കാരം നേടും.

നവംബര്‍ 21 മുതല്‍ ഡിസംബര്‍ 30 വരെ മത്സരത്തില്‍ രജിസ്റ്റര്‍ ചെയ്യാനുള്ള സമയമാണ്. www.madhyamam.com/dumdumbiriyani എന്ന ലിങ്ക് ഉപയോഗിച്ചാണ് സൗജന്യ രജിസ്ട്രേഷന്‍ പൂര്‍ത്തിയാക്കേണ്ടത്. 40,000 റിയാലിലധികം ക്യാഷ് പ്രൈസുകളും, 50,000 റിയാലിലധികം മൂല്യമുള്ള സമ്മാനങ്ങളും ട്രോഫിയും സ്ഥാനവസ്ത്രങ്ങളും സര്‍ട്ടിഫിക്കറ്റും വിജയികള്‍ക്ക് ലഭിക്കും.

ജിദ്ദ ഹോട്ടല്‍ ഗലേറിയയില്‍ നടന്ന ചടങ്ങില്‍ മത്സരത്തിന്റെ ലോഗോ പ്രകാശനവും പ്രഖ്യാപനവും നടന്നു. പ്രത്യേകം തയ്യാറാക്കിയ ബിരിയാണി ചെമ്പ് ദം പൊട്ടിച്ചാണ് മത്സരത്തിന്റെ പ്രഖ്യാപനം നടന്നത്. വിജയ് മസാല മാനേജിങ് ഡയറക്ടര്‍മാരായ സാജു മൂലന്‍, ജോയ് മൂലന്‍, ഡയറക്ടര്‍ പ്രവീണ്‍ മൂലന്‍, പാര്‍ട്ടണര്‍ അബ്ദുല്‍ അസീസ്, 'ഗള്‍ഫ് മാധ്യമം' ഗ്ലോബല്‍ ഓപ്പറേഷന്‍സ് ഹെഡ് മുഹമ്മദ് റഫീഖ്, മത്സര ബ്രാന്‍ഡ് അംബാസഡര്‍ രാജ് കലേഷ്, അബീര്‍ ഗ്രൂപ്പ് എക്‌സിക്യൂട്ടീവ് വൈസ് പ്രസിഡന്റ് ഡോ. അഹമ്മദ് ആലുങ്ങല്‍, കാഫ് ലോജിസ്റ്റിക്‌സ് സി.ഇ.ഒ അനീസ്, ശറഫിയ ട്രേഡിങ്ങ് ഡയറക്ടര്‍ നാഫി നീലാമ്പ്ര, 'ഗള്‍ഫ് മാധ്യമം' രക്ഷാധികാരികളായ എ. നജ്മുദ്ധീന്‍, ഫസല്‍ കൊച്ചി, പടിഞ്ഞാറന്‍ മേഖല കോഡിനേറ്റര്‍ ബഷീര്‍ ചുള്ളിയന്‍, സൗദി മാര്‍ക്കറ്റിങ് മാനേജര്‍ നിഷാദ് ഗഫൂര്‍ എന്നിവര്‍ സംസാരിച്ചു.

മത്സരത്തെക്കുറിച്ചുള്ള കൂടുതല്‍ വിവരങ്ങള്‍ക്കും ട്രേഡ്, സ്‌പോണ്‍സര്‍ഷിപ്പ് അന്വേഷണങ്ങള്‍ക്കും 0559280320, 0504507422, 0542837994 എന്നീ നമ്പറുകളിലോ nishad@gulfmadhyamam.net എന്ന ഈമെയിലിലോ ബന്ധപ്പെടാവുന്നതാണ്.