കുവൈത്ത് സിറ്റി: കുവൈത്തില്‍ താമസ നിയമത്തിലെ ആര്‍ട്ടിക്കിള്‍ 16 പ്രകാരം, അഞ്ച് പ്രത്യേക സാഹചര്യങ്ങളില്‍ സന്ദര്‍ശന വിസ (Visit Visa) താമസ വിസയാക്കി ( റെസിഡന്‍സി പെര്‍മിറ്റ്) ആക്കി മാറ്റാന്‍ അനുമതി നല്‍കി അധികൃതര്‍ ഉത്തരവിറക്കി. ഇതിനുള്ള മാനദണ്ഡങ്ങളനുസരിച്ച് മന്ത്രാലയങ്ങളുടെയോ സര്‍ക്കാര്‍ സ്ഥാപനങ്ങളുടെയോ ക്ഷണപ്രകാരം സര്‍ക്കാര്‍, പൊതുമേഖല ജോലിക്ക് എത്തുന്നവര്‍ക്ക് വിസ മാറ്റാനാവും. യൂണിവേഴ്‌സിറ്റി ബിരുദമോ സാങ്കേതിക യോഗ്യതയോ ഉണ്ടായിരിക്കണമെന്നതാണ് നിബന്ധന. കൂടാതെ റെസിഡന്‍സി അഫയേഴ്‌സ് ഡയറക്ടര്‍ ജനറലിന്റെ അനുമതിയും ആവശ്യമാണ്.

ഗാര്‍ഹിക ജോലികള്‍ക്കായി എത്തുന്നവര്‍ക്കും സന്ദര്‍ശന വിസ താമസ വിസയായി മാറ്റാം. കുവൈത്തില്‍ നിയമപരമായി താമസിക്കുന്നവരുടെ കുടുംബാംഗങ്ങളെ കാണാനോ ടൂറിസം ആവശ്യത്തിനോ എത്തുന്ന കുടുംബാംഗങ്ങള്‍ക്കും v(Family Reunion) വിസ സ്റ്റാറ്റസ് മാറ്റാന്‍ സാധിക്കും. വര്‍ക്ക് എന്‍ട്രി വിസയില്‍ എത്തി താമസ നടപടികള്‍ ആരംഭിച്ച ശേഷം, ഒരു മാസത്തില്‍ കവിയാതെ രാജ്യം വിട്ടുനില്‍ക്കുകയും പിന്നീട് തിരിച്ചെത്തുകയും ചെയ്തവര്‍ക്കും റെസിഡന്‍സി അഫയേഴ്‌സ് ഡയറക്ടര്‍ ജനറലിന്റെ വിവേചനാധികാരത്തില്‍ പ്രത്യേകമായി പരിഗണിക്കപ്പെടുന്നവര്‍ക്കും വിസ മാറ്റത്തിനു സാധിക്കും.

രാജ്യത്തെ കുടിയേറ്റ നയങ്ങള്‍ പാലിച്ചുകൊണ്ട് തന്നെ, യോഗ്യരായ സന്ദര്‍ശകര്‍ക്ക് നിയമപരമായ താമസം ഉറപ്പാക്കുകയാണ് ഈ നീക്കത്തിലൂടെ ലക്ഷ്യമിടുന്നത്. ഇത് തൊഴില്‍-സാമൂഹിക മേഖലകളിലേക്കുള്ള നടപടികള്‍ കൂടുതല്‍ ലളിതമാക്കുമെന്നും പ്രതീക്ഷിക്കുന്നു.