ദുബായ് : യു.എ.ഇ. ദേശീയ ദിനാഘോഷങ്ങളുടെ ഭാഗമായി ദുബായിലെ താമസക്കാര്‍ക്ക് സൗകര്യമൊരുക്കി റോഡ് ഗതാഗത അതോറിറ്റി (RTA). ഡിസംബര്‍ ഒന്ന്, രണ്ട് തീയതികളില്‍ എമിറേറ്റിലെ പ്രധാന പാര്‍ക്കിംഗ് കേന്ദ്രങ്ങളില്‍ രണ്ട് ദിവസത്തെ സൗജന്യ പാര്‍ക്കിംഗ് പ്രഖ്യാപിച്ചു. വാരാന്ത്യ അവധിയും (ഞായറാഴ്ച) ചേരുന്നതോടെ, സാധാരണ പാര്‍ക്കിംഗ് സ്ഥലങ്ങളില്‍ താമസക്കാര്‍ക്ക് ഫലത്തില്‍ മൂന്ന് ദിവസം സൗജന്യമായി പാര്‍ക്ക് ചെയ്യാം.

ബഹുനില പാര്‍ക്കിംഗ് കേന്ദ്രങ്ങള്‍, അല്‍ ഖൈല്‍ ഗേറ്റ് എന്‍ -365 എന്നിവിടങ്ങളിലെ പാര്‍ക്കിംഗിന് ഈ സൗജന്യം ബാധകമല്ല. ഡിസംബര്‍ 3 മുതല്‍ പാര്‍ക്കിംഗ് ഫീസുകള്‍ സാധാരണ നിലയിലാകും.

ദേശീയ ദിനാഘോഷങ്ങള്‍ കണക്കിലെടുത്ത് ദുബായ് മെട്രോ, ട്രാം സര്‍വീസുകളുടെ പ്രവര്‍ത്തന സമയത്തില്‍ ആര്‍.ടി.എ. മാറ്റങ്ങള്‍ വരുത്തി. ദുബായ് മെട്രോ (റെഡ് & ഗ്രീന്‍ ലൈനുകള്‍) നവംബര്‍ 29 (ശനി) പുലര്‍ച്ചെ 5:00 മുതല്‍ അടുത്ത ദിവസം പുലര്‍ച്ചെ 1:00 വരെയും നവംബര്‍ 30 (ഞായര്‍)രാവിലെ 8:00 മുതല്‍ അടുത്ത ദിവസം പുലര്‍ച്ചെ 1:00 വരെയും ഡിസംബര്‍ 1, 2 (തിങ്കള്‍, ചൊവ്വ) പുലര്‍ച്ചെ 5:00 മുതല്‍ അടുത്ത ദിവസം പുലര്‍ച്ചെ 1:00 വരെയും സര്‍വീസ് നടത്തും.

ദുബായ് ട്രാം നവംബര്‍ 29 (ശനി) രാവിലെ 6:00 മുതല്‍ രാത്രി 1:00 വരെയും നവംബര്‍ 30 (ഞായര്‍) രാവിലെ 9:00 മുതല്‍ രാത്രി 1:00 വരെയും ഡിസംബര്‍ 1, 2 (തിങ്കള്‍, ചൊവ്വ) രാവിലെ 6:00 മുതല്‍ രാത്രി 1:00 വരെയും സര്‍വീസ് നടത്തും. പൊതുഗതാഗത ബസുകളുടെ സര്‍വീസ് സമയത്തിലെ മാറ്റങ്ങള്‍ എസ്‌ഹെയില്‍ (S'hail) ആപ്പില്‍ ലഭ്യമാകും. അവധിക്കാലത്ത് തിരക്ക് ഒഴിവാക്കാനും ആഘോഷങ്ങള്‍ പൂര്‍ണ്ണമായി ആസ്വദിക്കാനും ഈ സൗകര്യങ്ങള്‍ ഉപകരിക്കും.