മക്ക: മക്കയില്‍ നിയമങ്ങള്‍ ലംഘിച്ച് പ്രവര്‍ത്തിച്ച 1313 സ്ഥാപനങ്ങള്‍ മുനിസിപ്പാലിറ്റി അടച്ചുപൂട്ടി. മക്ക കറക്ട്സ് എന്ന വിപുലമായ കാമ്പയിന്റെ ഭാഗമായാണ് നടപടി. നവംബര്‍ 8 മുതല്‍ 25 വരെയുള്ള കാലയളവില്‍ 6046 ഫീല്‍ഡ് പരിശോധനകളാണ് മുനിസിപ്പാലിറ്റി പൂര്‍ത്തിയാക്കിയത്. ചട്ടവിരുദ്ധമായി പ്രവര്‍ത്തിച്ച 783 വര്‍ക്ക്ഷോപ്പുകളും, 530 വെയര്‍ഹൗസുകളുമാണ് പൂട്ടിച്ചത്. കൂടാതെ നിരവധി സ്ഥാപനങ്ങള്‍ക്ക് നോട്ടീസ് നല്‍കുകയും ചെയ്തു.

ആരോഗ്യ-സുരക്ഷാ മാനദണ്ഡങ്ങള്‍ ഉറപ്പാക്കാനായി 1,544 റെസ്റ്റോറന്റുകള്‍, 1,411 പലചരക്ക് കടകള്‍, 1,203 ഫുഡ് ട്രക്കുകള്‍ എന്നിവിടങ്ങളിലും പരിശോധന പൂര്‍ത്തിയാക്കി. ഇതില്‍ 232 സ്ഥാപനങ്ങള്‍ക്ക് മുന്നറിയിപ്പ് നല്‍കി. മക്കയിലെ ജീവിതനിലവാരം ഉയര്‍ത്താനുള്ള തുടര്‍ച്ചയായ പദ്ധതികളുടെ ഭാഗമാണ് മക്ക കറക്ട്സ് പരിശോധനകളെന്നും കാമ്പയിന്‍ എല്ലാ പ്രദേശങ്ങളിലും മാര്‍ക്കറ്റുകളിലും തീവ്രമായി തുടരുമെന്നും മുനിസിപ്പാലിറ്റി അറിയിച്ചു.