ജിദ്ദ: ജിദ്ദയിലും പരിസരങ്ങളിലുമുള്ള പാണ്ടിക്കാട് നിവാസികളുടെ കൂട്ടായ്മയായ പാണ്ടിക്കാട് പഞ്ചായത്ത് പ്രവാസി അസോസിയേഷൻ (പപ്പ) സംഘടിപ്പിച്ച സൗഹൃദ സംഗമം, ' പപ്പോത്സവം 2k25 ആവേശമായി. നാട്ടിലും മറുനാട്ടിലുമായി നിരവധി ജീവകാരുണ്യ-ക്ഷേമ പ്രവർത്തനങ്ങൾക്ക് ചുക്കാൻ പിടിക്കുന്ന ഈ കൂട്ടായ്മയുടെ വാർഷിക സംഗമത്തിൽ കുടുംബങ്ങളടക്കം എഴുന്നൂറോളം ആളുകളാണ് പങ്കെടുത്തത്.
ഒരു രാവ് മുഴുവൻ നീണ്ടുനിന്ന ഈ മഹാസംഗമം പാണ്ടിക്കാട്ടുകാരുടെ ഊഷ്മള സൗഹൃദം ഒരിക്കൽ കൂടി ഊട്ടിയുറപ്പിച്ചു. കുട്ടികളുടെയും നാട്ടുകാരുടെയും വൈവിധ്യമാർന്ന കലാപരിപാടികൾ, പ്രൊഫഷണൽ ഗായകരുടെ ഗാനമേള, നൃത്ത നിരുത്തങ്ങൾ എന്നിവ പരിപാടിക്ക് മിഴിവേകി.
സാംസ്‌കാരിക സമ്മേളനം ജിദ്ദ പൗരാവലി ചെയർമാൻ കബീർ കൊണ്ടോട്ടി ഉദ്ഘാടനം ചെയ്തു. പപ്പയുടെ ഐക്യത്തെയും ജീവകാരുണ്യ പ്രവർത്തനങ്ങളെയും അദ്ദേഹം മുക്തകണ്ഠമായി പ്രശംസിച്ചു. കിംഗ് അബ്ദുൽ അസീസ് ഹോസ്പിറ്റലിലെ നിതിൻ ജോർജ്ജ്‌ ആരോഗ്യ സെമിനാർ നടത്തി.
പപ്പ പ്രസിഡൻ്റ് നെർഷാദ് അധ്യക്ഷത വഹിച്ച ചടങ്ങിൽ ജിദ്ദയിലെ പ്രശസ്ത പത്രപ്രവർത്തകൻ മുസാഫിർ ആശംസകൾ നേർന്നു. പപ്പയുടെ ഉദ്ദേശലക്ഷ്യങ്ങൾ സവിസ്തരം പ്രതിപാദിച്ചുകൊണ്ട് ഫൈസൽ കൊടശ്ശേരി സ്വാഗതപ്രസംഗം നടത്തി. സമീർ വി.പി. നന്ദി പറഞ്ഞു. എ.ടി. ഇസ്ഹാക്, എ.ടി. അമ്പു, റസാഖ് റീഗൾ എന്നിവർ വേദിയിൽ സന്നിഹിതരായിരുന്നു. പരിപാടി കൺവീനർ ബാവ ചെമ്പ്രശ്ശേരി, ഫൈസൽ കൊടശ്ശേരി , അബു സിദ്ദിഖ് എന്നിവരാണ് വേദി നിയന്ത്രിച്ചത്.
കായിക മത്സരവും വിരുന്നും
കായിക പ്രതിഭകളുടെ മാറ്റ് പരീക്ഷിച്ച ഫുട്ബോൾ ഷൂട്ടൗട്ട് മത്സരത്തിൽ പഞ്ചായത്തിലെ പതിനാലോളം ക്ലബ്ബുകൾ പങ്കെടുത്തു. വിജയികൾക്ക് ബാവ ചെമ്പ്രശേരി, ആപ കൊടശ്ശേരി, നൗഷാദ് വിപി, സമീർ വളരാട്, ഹക്കീം, അമീൻ എ.ടി., ഷാഫി മഹമൂദ്, ബഷീർ, അൻഷാദ് എന്നിവർ ചേർന്ന് സമ്മാനങ്ങൾ നൽകി.
കൂപ്പൺ നറുക്കെടുപ്പിലൂടെ നിരവധി ഭാഗ്യശാലികൾക്ക് സമ്മാനങ്ങൾ ലഭിച്ചു. ഖാലിദ്, ഷംസു, മുനീർ എന്നിവർ നേതൃത്വം നൽകിയ രുചികരമായ വിരുന്നോടു കൂടിയാണ് മുഴുവൻ ആളുകളും പിരിഞ്ഞുപോയത്.

ഫോട്ടോ: പാണ്ടിക്കാട് കൂട്ടായ്മയുടെ സൗഹൃദ സംഗമം ജിദ്ദ പൗരാവലി ചെയർമാൻ കബീർ കൊണ്ടോട്ടി ഉദ്ഘാടനം ചെയ്യുന്നു.