ദുബായ്: ദുബായില്‍ നടന്ന 'ഓര്‍മ കേരളോത്സവം' പരിപാടിയില്‍ സംസാരിക്കവെ പ്രമുഖ വ്യവസായി എം.എ. യൂസഫലി, പിണറായി വിജയന്‍ വീണ്ടും കേരളത്തിന്റെ മുഖ്യമന്ത്രിയായി അധികാരത്തില്‍ തിരിച്ചെത്തുമെന്ന വിശ്വാസം പ്രകടിപ്പിച്ചു. യു.എ.ഇ.യുടെ മതസൗഹാര്‍ദ്ദപരമായ അന്തരീക്ഷത്തെ അദ്ദേഹം പ്രശംസിച്ചു. മുഖ്യമന്ത്രിയെയും പ്രധാനമന്ത്രിയെയും ഒരുപോലെ സ്വാഗതം ചെയ്യുന്ന നാടാണ് ഇതെന്നും, ജനങ്ങള്‍ സന്തോഷത്തോടെയും മതസൗഹാര്‍ദ്ദത്തോടെയും ഒത്തൊരുമിച്ച് ജീവിക്കുന്ന രാജ്യമാണിതെന്നും അദ്ദേഹം ചൂണ്ടിക്കാട്ടി.

താന്‍ ഒരു കച്ചവടക്കാരന്‍ മാത്രമാണെന്നും രാഷ്ട്രീയമില്ലെന്നും യൂസഫലി ആവര്‍ത്തിച്ചു. 52 വര്‍ഷം മുമ്പ് താന്‍ യു.എ.ഇയില്‍ വന്നതുമുതല്‍ ഈ രാജ്യം തനിക്ക് എല്ലാം നല്‍കിയെന്നും അദ്ദേഹം അനുസ്മരിച്ചു.

കേരളത്തോടുള്ള യു.എ.ഇ. ഭരണാധികാരികളുടെ സ്‌നേഹവും സമീപനവും അദ്ദേഹം എടുത്തു പറഞ്ഞു. 'കേരളവും അവിടുത്തെ ജനതയും ഹൃദയത്തിലാണെ' എന്നാണ് യു.എ.ഇ. ഭരണാധികാരികള്‍ പറയുന്നത്. കേരള ജനത ഈ രാജ്യത്തിന്റെ ഉയര്‍ച്ചയില്‍ പ്രധാന പങ്ക് വഹിക്കുന്നുണ്ടെന്നും യൂസഫലി അഭിപ്രായപ്പെട്ടു. ഇവിടുത്തെ ഭരണാധികാരികള്‍ സ്‌നേഹവും സഹോദര്യവുമാണ് നല്‍കുന്നത്. യു.എ.ഇ.യിലെ രാഷ്ട്രീയം ജീവിതപ്രശ്‌നങ്ങളെ അടിസ്ഥാനമാക്കിയുള്ളതാണെന്നും അദ്ദേഹം കൂട്ടിച്ചേര്‍ത്തു.