ദമാം: ശാസ്ത്രീയ അവബോധം വളര്ത്തി സമൂഹത്തിന് ചലനാത്മക സാന്നിധ്യമായി വിദ്യാര്ത്ഥികളെ രൂപപ്പെടുത്തിയെടുക്കാന് ലക്ഷ്യം വെച്ച് ബയോസ് സ്റ്റുഡന്സ് സയന്സ് ക്ലബ്ബ് രൂപീകരിച്ചു. ദമാമില് വിദ്യാര്ത്ഥികളുടേയും, രക്ഷിതാക്കളുടേയും സാന്നിധ്യത്തില് നടന്ന ചടങ്ങ് മാധ്യമ പ്രവര്ത്തകനും, എഴുത്തുകാരനുമായ സാജിദ് ആറാട്ടുപുഴ ഉദ്ഘാടനം ചെയ്തു. പാഠ പുസ്തകങ്ങള്ക്കപ്പുറത്ത് ലഭിക്കുന്ന അറിവുകളാണ് വിശാലമായ കാഴ്ചപ്പാടുകളുള്ള പൗരനെ രൂപപ്പെടുത്തുന്ന വ്യക്തിത്വമുള്ളവരായി വിദ്യാര്ത്ഥികളെ മാറ്റുന്നതെന്ന് അദ്ദേഹം പറഞ്ഞു.
ഓരോ കുട്ടികളിലുമുള്ള അന്തര്ലീനമായ കഴിവുകള്ക്ക് പുതിയ ദിശാബോധം നല്കികൊണ്ട് ധാര്മ്മിക മൂല്യങ്ങളില് അധിഷ്ഠിതമായി ദൈനംദിന ജീവിതം ചിട്ടപ്പെടുത്താനും, ശാസ്ത്രീയ അറിവിന്റെ വെളിച്ചത്തില് വിഷയങ്ങളെ മനസ്സിലാക്കി ചിന്തോദ്ദീപകമായ അന്വേഷണങ്ങളെ പ്രോത്സാഹിപ്പിക്കാന് ഉതകുന്ന ഗവേഷണോന്മുഖമായ പദ്ധതിയാണ് ബയോസ്.
ഉദ്ഘാടന സെഷനില്, ഭാവി അവസരങ്ങള്, അക്കാദമിക് വെല്ലുവിളികള് എന്ന വിഷയത്തില് ഷാഫി മാസ്റ്റര് ചിറ്റത്തുപാറ സംഭാഷണം നടത്തി. ടോസ്റ്റ്മാസ്റ്റര് മുനീര് പി. ബയോസ് സിലബസ് വിശദീകരിച്ചു. ശബീര് വെള്ളാടത്ത്, നൗഷാദ് കുനിയില്, യൂസുഫ് കൊടിഞ്ഞി, സമീര് പിഎച്ച് എന്നിവര് കുട്ടികളുമായി സംവദിച്ചു.
പടം: ബയോസ് സ്റ്റുഡന്സ് സയന്സ് ക്ലബ്ബിന്റെ ഉദ്ഘാടനം മാധ്യമ പ്രവര്ത്തകന് സാജിദ് ആറാട്ടുപുഴ നിര്വ്വഹിക്കുന്നു.
Related News
