റിയാദ്: പബ്ലിക്കേഷന്സ് ആന്ഡ് പബ്ലിഷിംഗ് നിയമം ലംഘിക്കുന്ന ഉള്ളടക്കം പ്രസിദ്ധീകരിച്ചതിന് ഒമ്പത് വ്യക്തികള്ക്കെതിരെ നടപടി സ്വീകരിച്ചതായി ജനറല് അതോറിറ്റി ഫോര് മീഡിയ റെഗുലേഷന് അറിയിച്ചു. ബന്ധപ്പെട്ട അവലോകന സമിതികളുടെ ശുപാര്ശയുടെ അടിസ്ഥാനത്തിലാണ് ഈ തീരുമാനം.
പൊതു ക്രമസമാധാനം തകര്ക്കുക, ദേശീയ താല്പ്പര്യങ്ങള്ക്ക് ഹാനി വരുത്തുക, സമൂഹത്തില് ഭിന്നതയുണ്ടാക്കുക തുടങ്ങിയവയാണ് ഇവര് ചെയ്ത ലംഘനങ്ങളെന്ന് അതോറിറ്റി വ്യക്തമാക്കി. ഇത് ഇലക്ട്രോണിക് പബ്ലിഷിംഗ് ചട്ടങ്ങളിലെ ആര്ട്ടിക്കിള് 15-ന്റെ വ്യക്തമായ ലംഘനമാണ്.
നിയമലംഘകര്ക്ക് പിഴ ചുമത്തുന്നതിനൊപ്പം, നിയമവിരുദ്ധമായ ഉള്ളടക്കം പ്രചരിപ്പിക്കാന് ഉപയോഗിച്ച അക്കൗണ്ടുകള് നീക്കം ചെയ്യാനും അതോറിറ്റി ഉത്തരവിട്ടിട്ടുണ്ട്.
നിയമങ്ങളും ചട്ടങ്ങളും ലംഘിക്കുന്ന ഒരു മാധ്യമ ഉള്ളടക്കവും വെച്ചുപൊറുപ്പിക്കില്ലെന്ന് മീഡിയ റെഗുലേറ്ററി അതോറിറ്റി മുന്നറിയിപ്പ് നല്കി. അംഗീകൃത മാധ്യമ മാനദണ്ഡങ്ങള് പാലിക്കുന്നുണ്ടെന്ന് ഉറപ്പാക്കാന് ആവശ്യമായ എല്ലാ കര്ശന നടപടികളും സ്വീകരിക്കുമെന്നും അതോറിറ്റി വ്യക്തമാക്കി.
Related News
