ജിദ്ദ- ബോളിവുഡിലെ പ്രമുഖ ഗായിക ഷിബാനി കശ്യപ് നയിച്ച സംഗീതവിരുന്ന് ജിദ്ദയിലെ സംഗീതാസ്വാദകര്ക്ക് അവിസ്മരണീയമായി. വിവിധ കാലഘട്ടങ്ങളിലുള്ള ഗാനങ്ങളുടെ അവിസ്മരണീയമായ അനുഭവമാണ് കശ്യപ് സമ്മാനിച്ചത്. ഇന്ത്യന് കോണ്സുലേറ്റ് സംഘടിപ്പിച്ച 'ഇന്ത്യന് നൈറ്റ്' പരിപാടിയുടെ ഭാഗമായാണ് പാര്ക് ഹയാത്തില് ഈ വേദി ഒരുക്കിയത്.
റെഡ് സീ ഫിലിം ഫെസ്റ്റിവലുമായി ബന്ധപ്പെട്ട് സൗദിയില് എത്തിയ ഷിബാനി, അറുപതുകളിലെ മനോഹരമായ മെലഡികള് മുതല് ആധുനിക ബോളിവുഡ് ഗാനങ്ങള് വരെ വൈവിധ്യമാര്ന്ന സംഗീതം അവതരിപ്പിച്ചു.
ഇന്ത്യന് അംബാസഡര് സുഹൈല് അജാസ് ഖാന്, പ്രശസ്ത ബോളിവുഡ് സംവിധായകന് മുസഫര് അലി ഖാന് എന്നിവര് ഉള്പ്പെടെയുള്ള വിശിഷ്ട വ്യക്തികള് ചടങ്ങില് പങ്കെടുത്തു. ബോളിവുഡ് ഇതിഹാസം രേഖയോടൊപ്പം റെഡ് സീ ഫിലിം ഫെസ്റ്റിവലിലെ റെഡ് കാര്പ്പെറ്റിലും ഷിബാനികശ്യപ് തിളങ്ങിയിരുന്നു.
