ദുബായ്: 2026 ജനുവരി രണ്ട് മുതല് യു എ ഇയിലെ വെള്ളിയാഴ്ച പ്രാര്ഥനാ സമയം ഉച്ചയ്ക്ക് 12.45ലേക്ക് മാറ്റുന്നതോടെ രാജ്യത്തെ സ്കൂളുകളുടെയും ഓഫീസുകളുടെയും സമയക്രമത്തിലും മാറ്റം വന്നേക്കും. വിദ്യാര്ഥികള്ക്ക് പ്രാര്ഥനക്ക് എത്താന് സൗകര്യമൊരുക്കുന്നതിനായി സ്കൂളുകള് നേരത്തെ അധ്യയനം അവസാനിപ്പിക്കാനാണ് സാധ്യത.
ഇസ്ലാമിക് അഫയേഴ്സ് ആന്ഡ് എന്ഡോവ്മെന്റ്സ് അതോറിറ്റിയാണ് ജുമുഅ സമയമാറ്റം പ്രഖ്യാപിച്ചത്. മുസ്ലിം വിദ്യാര്ഥികള്ക്ക് പ്രാര്ഥനയ്ക്ക് മുമ്പായി വീട്ടിലെത്താന് കഴിയുന്നുണ്ടെന്ന് ഉറപ്പാക്കാന് സമയക്രമത്തില് മാറ്റം വരുത്തേണ്ടി വരുമെന്ന് സ്കൂള് അധികൃതര് വ്യക്തമാക്കി. സമയമാറ്റം അധ്യയന സമയത്തെയും പ്രവര്ത്തനങ്ങളെയും എങ്ങനെ ബാധിക്കുമെന്ന് മനസ്സിലാക്കാന് ദുബായിലെ നോളജ് ആന്ഡ് ഹ്യൂമന് ഡെവലപ്മെന്റ് അതോറിറ്റി (കെ എച്ച് ഡി എ) സ്കൂളുകളില് സര്വേ ആരംഭിച്ചിട്ടുണ്ട്. വിദ്യാഭ്യാസ വകുപ്പില് നിന്നുള്ള ഔദ്യോഗിക നിര്ദേശങ്ങള്ക്കായി കാത്തിരിക്കുകയാണ് സ്കൂളുകള്.
പ്രാര്ഥനാ സമയം ഉച്ചക്ക് 12.45ലേക്ക് മാറ്റുന്നതോടെ ഓഫീസുകള്ക്കും സമയക്രമത്തില് മാറ്റം വരുത്തേണ്ടിവരും. പുതിയ സമയത്തിന് അനുസരിച്ച് വെള്ളിയാഴ്ചകളിലെ ദിനചര്യകള് ക്രമീകരിക്കാന് താമസക്കാരും ഒരുങ്ങുകയാണ്. എന്നാല്, നടപ്പിലാവാന് ഒരു മാസത്തിലധികം സമയം ലഭിക്കുന്നതിനാല് സ്ഥാപനങ്ങള്ക്ക് വേണ്ട മുന്നൊരുക്കം എടുക്കാന് സാധിക്കും.
Related News
