റിയാദ്: സൗദി അറേബ്യയുടെ തലസ്ഥാനമായ റിയാദിന് അഭിമാന നേട്ടം. മിഡില് ഈസ്റ്റിലെ ആദ്യത്തെ 'ഗ്ലോബല് ആക്ടീവ് സിറ്റി' എന്ന പദവി റിയാദ് സ്വന്തമാക്കി. ഇന്റര്നാഷണല് ഒളിമ്പിക് കമ്മിറ്റിയുടെ (IOC) പിന്തുണയോടെയുള്ള ആക്ടീവ് വെല് ബീയിങ് ഇനിഷ്യേറ്റീവ് (AWI) നല്കുന്ന സര്ട്ടിഫിക്കറ്റാണ് റിയാദിന് ലഭിച്ചത്. റോയല് കമ്മിഷന് ഫോര് റിയാദ് സിറ്റി (RCRC) ആണ് ഇക്കാര്യം അറിയിച്ചത്. ആരോഗ്യകരമായ ജീവിതശൈലി, ശാരീരിക പ്രവര്ത്തനങ്ങള്, സാമൂഹിക ക്ഷേമം എന്നിവ പ്രോത്സാഹിപ്പിക്കുന്നതിലുള്ള റിയാദിന്റെ മികച്ച പ്രകടനമാണ് അംഗീകാരത്തിന് അര്ഹമാക്കിയത്.
പൊതു ഇടങ്ങള്, നടപ്പാതകള്, സൈക്കിള് പാതകള്, അത്യാധുനിക കായിക സൗകര്യങ്ങള്, സമൂഹ ഇനിഷ്യേറ്റീവുകള് എന്നിവ ഉള്പ്പെടുന്ന സമഗ്രമായ നഗര പരിസ്ഥിതി റിയാദ് ഉറപ്പാക്കി.
റിയാദ് സിറ്റി റോയല് കമ്മിഷന് സിഇഒ ഇബ്രാഹിം ബിന് മുഹമ്മദ് അല്-സുല്ത്താന് ഈ നേട്ടത്തിന് പിന്നില് നേതൃപരമായ പിന്തുണ ഉണ്ടെന്ന് വിശദീകരിച്ചു. സര്ട്ടിഫിക്കറ്റ് നേടുന്നതില് നിര്ണ്ണായക പങ്ക് വഹിച്ച കായിക മന്ത്രാലയം, സൗദി സ്പോര്ട്സ് ഫോര് ഓള് ഫെഡറേഷന്, മറ്റ് മന്ത്രാലയങ്ങള് എന്നിവര്ക്ക് അദ്ദേഹം നന്ദി പറഞ്ഞു. ഈ ശ്രമങ്ങളില് 20-ല് അധികം സ്ഥാപനങ്ങള് സഹകരിച്ചതായും അധികൃതര് അറിയിച്ചു.
Related News
