മക്ക: വിശുദ്ധ മക്കയിലെത്തുന്ന തീര്ഥാടകര്ക്ക് ആരാധനാ കര്മങ്ങള് കൂടുതല് ലളിതവും ആധുനികവുമാക്കാന് സ്മാര്ട്ട് സാങ്കേതികവിദ്യയുമായി ഇരുഹറം കാര്യാലയം. ഉംറയുടെ ഓരോ ഘട്ടത്തിലും കൃത്യമായ മാര്ഗ്ഗനിര്ദേശം നല്കുന്ന 'ഡിജിറ്റല് മുത്വവ്വിഫ്' പ്ലാറ്റ്ഫോമാണ് തീര്ഥാടകര്ക്കായി സജ്ജീകരിച്ചിരിക്കുന്നത്.
ഹറം പള്ളിയുടെ വിശാലമായ ഉള്ഭാഗങ്ങളില് വഴിതെറ്റാതെ സഞ്ചരിക്കാന് സഹായിക്കുന്ന അത്യാധുനിക മാപ്പിംഗ് സംവിധാനം, ത്വവാഫിന്റെയും സഅ്യിന്റെയും എണ്ണം തെറ്റാതെ കണക്കാക്കാന് സഹായിക്കുന്ന ഡിജിറ്റല് ട്രാക്കര് (ഇത് തീര്ഥാടകര്ക്ക് എണ്ണത്തെക്കുറിച്ച് വേവലാതിപ്പെടാതെ പ്രാര്ഥനകളില് പൂര്ണ്ണമായി ശ്രദ്ധ കേന്ദ്രീകരിക്കാന് അവസരമൊരുക്കുന്നു), ഓരോ ഘട്ടത്തിലും ചൊല്ലേണ്ട പ്രാര്ഥനകള് ഓഡിയോ, വീഡിയോ രൂപത്തില് ലഭ്യം എന്നില ഈ പ്ലാറ്റ്ഫോമിന്റെ സവിശേഷതകളാണ്. ഏഴ് ഭാഷകളില് ഈ സേവനം ലഭ്യമാണ് എന്നത് ആഗോള തീര്ഥാടകര്ക്ക് വലിയ അനുഗ്രഹമാണ്.
ആദ്യമായി ഉംറക്കെത്തുന്നവര്ക്കും പ്രായമായവര്ക്കും ഏറെ ആശ്വാസം നല്കുന്നതാണ് ഈ പദ്ധതി. ഒരു സഹായിയുടെ കൂട്ടില്ലാതെ തന്നെ കര്മങ്ങള് കൃത്യതയോടെ പൂര്ത്തിയാക്കാന് ഇത് ഓരോരുത്തരെയും പ്രാപ്തരാക്കുന്നു. സ്മാര്ട്ട് ഫോണിലൂടെ വളരെ ലളിതമായി ഈ സേവനങ്ങള് ആക്സസ് ചെയ്യാം.
'സാങ്കേതികവിദ്യയുടെ സഹായത്തോടെ തീര്ഥാടകര്ക്ക് മികച്ച അനുഭവം നല്കുക എന്നതാണ് ഈ പ്ലാറ്റ്ഫോമിലൂടെ ലക്ഷ്യമിടുന്നത്.' - ഇരുഹറം കാര്യാലയം വ്യക്തമാക്കി.
Related News
