റിയാദ്: നടനും തിരക്കഥാകൃത്തുമായ ശ്രീനിവാസന്റെ വേര്‍പാടില്‍ ഒ.ഐ.സി.സി കണ്ണൂര്‍ ജില്ലാ കമ്മിറ്റി അനുശോചിച്ചു. മലയാള സിനിമയില്‍ സാധാരണക്കാരുടെ സുഖവും ദുഃഖവും നിസ്സഹായതകളും തന്റെ തനതായ ശൈലിയിലും വാക്കുകളിലും ജീവിപ്പിച്ച അദ്ദേഹം, ചിരിപ്പിക്കുന്നതിനൊപ്പം ചിന്തിപ്പിക്കുകയും ചെയ്ത അപൂര്‍വ പ്രതിഭയായിരുന്നു എന്ന് അനുശോചന യോഗത്തില്‍ അഭിപ്രായപ്പെട്ടു.

ഹാസ്യത്തിലൂടെ സത്യങ്ങളും സമൂഹത്തിന്റെ ദൗര്‍ബല്യങ്ങളും തുറന്നുകാട്ടിയ അദ്ദേഹത്തിന്റെ കഥാപാത്രങ്ങള്‍ നമ്മളില്‍ പലരുടെയും ജീവിതമായിരുന്നു. മലയാള സിനിമയ്ക്ക് അദ്ദേഹം നല്‍കിയത് വെറും വിനോദം മാത്രമല്ല, ഒരു നിലപാടായിരുന്നു. കാലം എത്ര തന്നെ മാറിയാലും ശ്രീനിവാസന്റെ സിനിമകള്‍ എന്നും മനുഷ്യ മനസ്സിനെ സ്പര്‍ശിച്ചുകൊണ്ടേയിരിക്കും. അദ്ദേഹത്തിന്റെ വാക്കുകളും കഥാപാത്രങ്ങളും ഓരോ മലയാളിയുടെ ഓര്‍മ്മകളിലും എന്നും മായാതെ തുടരുമെന്ന് ഒ. ഐ. സി. സി കണ്ണൂര്‍ ജില്ലാ കമ്മിറ്റി അനുശോചന കുറിപ്പില്‍ പറഞ്ഞു.