റിയാദ്- 1916ല് ആധുനിക സൗദി അറേബ്യയുടെ സ്ഥാപകന് കിംഗ് അബ്ദുല് അസീസ് അല് സൗദ് ബസ്രയുടെ പ്രാന്തപ്രദേശങ്ങളില് നടത്തിയ സന്ദര്ശനത്തിന്റെ അപൂര്വ്വമായ ആര്ക്കൈവ് ചിത്രങ്ങള് കിംഗ് അബ്ദുല് അസീസ് ഫൗണ്ടേഷന് (ദാറ) പുറത്തുവിട്ടു. പ്രാദേശിക ബന്ധങ്ങള് ശക്തിപ്പെടുത്തുന്നതിനുള്ള അദ്ദേഹത്തിന്റെ ആദ്യകാല ശ്രമങ്ങളുടെ ഭാഗമായിരുന്നു ഈ സന്ദര്ശനം.
ബ്രിട്ടീഷ് ഫോട്ടോഗ്രാഫറായ ഗെര്ട്രൂഡ് ബെല് പകര്ത്തിയ ഈ ചിത്രങ്ങളില്, ബസ്രയിലെ മരുഭൂമിയില് തന്റെ അനുയായികള്ക്കിടയില് ഗാംഭീര്യത്തോടെ നില്ക്കുന്ന കിംഗ് അബ്ദുല് അസീസിനെ കാണാം. ഈ ചരിത്രരേഖകള് അദ്ദേഹത്തിന്റെ ദീര്ഘവീക്ഷണത്തിനും മേഖലയിലെ ആദ്യകാല രാഷ്ട്രീയ-യയതന്ത്ര സാന്നിധ്യത്തിനും തെളിവായി വിലയിരുത്തപ്പെടുന്നു.
അധികാരം പിടിച്ചെടുക്കാനല്ല, മറിച്ച് മേഖലയില് സമാധാനവും ഐക്യവും ഉറപ്പാക്കാനാണ് അദ്ദേഹം അതിര്ത്തികള് കടന്നതെന്ന് ഈ സന്ദര്ശനം വ്യക്തമാക്കുന്നു. അറബ് രാജ്യങ്ങളുമായും അന്താരാഷ്ട്ര സമൂഹവുമായും ആശയവിനിമയം വ്യാപിപ്പിക്കാനും ബന്ധങ്ങള് ഉറപ്പിക്കാനുമുള്ള അദ്ദേഹത്തിന്റെ ആദ്യകാല ശ്രമങ്ങളുടെ ഭാഗമായിരുന്നു ഇത്.
ഇരുപതാം നൂറ്റാണ്ടിന്റെ തുടക്കത്തില് അറേബ്യന് ഉപദ്വീപിലുണ്ടായ വലിയ മാറ്റങ്ങളെ അടയാളപ്പെടുത്തുന്ന ഗെര്ട്രൂഡ് ബെല്ലിന്റെ ശേഖരത്തിലെ പ്രധാനപ്പെട്ട ഭാഗമാണ് ഈ ചിത്രങ്ങള്.
Related News
