ജിദ്ദ- ജിദ്ദ സീസണിന്റെ ഭാഗമായി ഒരുക്കിയിരിക്കുന്ന 'വിന്റര് വണ്ടര്ലാന്ഡ് ജിദ്ദ' സന്ദര്ശകര്ക്ക് സമ്മാനിക്കുന്നത് അത്ഭുതകരമായ ശൈത്യകാല അനുഭവങ്ങള്. ജിദ്ദയുടെ ഉഷ്ണമേഖലാ കാലാവസ്ഥയില്നിന്ന് ധ്രുവപ്രദേശത്തെ മഞ്ഞുമൂടിയ അന്തരീക്ഷത്തിലേക്ക് സന്ദര്ശകരെ കൂട്ടിക്കൊണ്ടുപോകുന്ന ഈ വിനോദകേന്ദ്രം ഇപ്പോള് സന്ദര്ശകരുടെ പ്രധാന ആകര്ഷണമായി മാറിയിരിക്കുകയാണ്.
ഇവിടുത്തെ ഏറ്റവും വലിയ പ്രത്യേകത അത്യാധുനികമായ 'സ്നോ ഡോം' ആണ്. ഡോമിനുള്ളില് പ്രവേശിക്കുന്നവര്ക്ക് 360 ഡിഗ്രി കോണില് ആകാശത്തെ വിസ്മയക്കാഴ്ചയായ 'നോര്ത്തേണ് ലൈറ്റ്സ്' ആസ്വദിക്കാം. ചലിക്കുന്ന പ്രകാശവിന്യാസങ്ങളും നിറം മാറുന്ന ആകാശവും സന്ദര്ശകരുമായി സംവദിക്കുന്ന രീതിയിലാണ് സജ്ജീകരിച്ചിരിക്കുന്നത്. സന്ദര്ശകര്ക്ക് ഡോമിനുള്ളിലെ ആകാശത്ത് ക്രിയാത്മകമായി വരകള് വരയ്ക്കാനും ഡിസൈനുകള് നിര്മ്മിക്കാനും സാധിക്കും.
60 ദിവസം നീണ്ടുനില്ക്കുന്ന ഈ ഉത്സവത്തില് കുടുംബങ്ങള്ക്കും കുട്ടികള്ക്കുമായി നിരവധി വിനോദങ്ങള് ഒരുക്കിയിട്ടുണ്ട്. ശബ്ദ-വെളിച്ച വിന്യാസങ്ങളിലൂടെയും കഥപറച്ചിലിലൂടെയും സന്ദര്ശകരെ മറ്റൊരു ലോകത്തേക്ക് എത്തിക്കുന്ന ഗെയിം ഏറെ ആവേശകരമാണ്.
ടോയ് ടൗണ്, നോര്ത്ത് പൂള് , വൈല്ഡ് വിന്റര് , ഫ്രോസ്റ്റ് ഫെയര് എന്നിങ്ങനെ നാല് സോണുകളായി തിരിച്ചാണ് പ്രവര്ത്തനങ്ങള്.
