ജിസാന്: റോഡപകടത്തില് ഗുരുതരമായി പരിക്കേറ്റ തമിഴ്നാട് സ്വദേശിനിയായ നഴ്സ് അബൂഅരീഷ് കിംഗ് ഫഹദ് സ്പെഷ്യാലിറ്റി ആശുപത്രിയില് മരിച്ചു. ചെന്നൈ പട്ടാഭിറാം ഗാന്ധിനഗറില് അരുള് ദോസ് മോഹനന്റെ ഭാര്യ ബ്യൂള അരുള് ദോസാണ് (47) മരിച്ചത്. ജിസാന് അല്അഹദിനു സമീപമുള്ള ഖോബ മിലിട്ടറി ആശുപത്രിയിലെ സ്റ്റാഫ് നഴ്സായിരുന്നു. ഈ മാസം പത്തിന് രാത്രി ജോലികഴിഞ്ഞ് താമസ സ്ഥലത്തേക്ക് മടങ്ങവേ റോഡ് മുറിച്ചുകടക്കുന്നതിനിടയില് അമിത വേഗത്തില് വന്ന കാര് ഇടിച്ചാണ് അപകടമുണ്ടായത്. അപകടത്തില് തലയ്ക്കും ശരീരത്തിനും ഗുരുതമായി പരിക്കേറ്റ ബ്യൂളയെ പട്രോള് പൊലീസാണ് ആശുപത്രിയിലെത്തിച്ചത്. കഴിഞ്ഞ 12 ദിവസമായി അബൂഅരീഷ് കിംഗ് ഫഹദ് ആശുപത്രിയിലെ തീവ്രപരിചരണ വിഭാഗത്തില് അബോധാവസ്ഥയിലായിരുന്ന ബ്യൂള ഇന്ന് ഉച്ചയോടെയാണ് മരിച്ചത്.
കഴിഞ്ഞ 21 വര്ഷമായി ജിസാനില് സൗദി ആരോഗ്യ മന്ത്രാലയത്തിന്റെ വിവിധ ആശുപത്രികളില് ജോലി ചെയ്യുകയായിരുന്നു. ഭര്ത്താവ് അരുള് ദോസ് മോഹന് അരാമെക്സ് ജിസാന് അല്അഹദ് ശാഖയിലെ ജീവനക്കാരനാണ്. ഭര്ത്താവും കുടുംബവുമൊത്ത് ജിസാനിലെ അല് അഹദില് താമസിക്കുകയായിരുന്നു. അപകടം നടക്കുന്നതിന് പത്ത് ദിവസം മുമ്പാണ് ഇരുവരും അവധികഴിഞ്ഞ് നാട്ടില് നിന്നെത്തിയത്. മക്കളായ പ്രൈസി അരുള്, പോള് മോസസ് എന്നിവര് ഇപ്പോള് ചെന്നൈയില് വിദ്യാര്ത്ഥികളാണ്. കിംഗ് ഫഹദ് ആശുപത്രി മോര്ച്ചറിയില് സൂക്ഷിച്ചിരിക്കുന്ന മൃതദേഹം നിയമനടപടികള് പൂര്ത്തിയാക്കി എത്രയും വേഗം നാട്ടിലേക്ക് കൊണ്ടുപോകുമെന്ന് ഭര്ത്താവ് അരുള് ദോസ് പറഞ്ഞു.
Related News
