റിയാദ്: പ്രവാസലോകത്ത് കാരുണ്യത്തിന്റെയും ഐക്യത്തിന്റെയും കൈയൊപ്പ് ചാര്ത്തിയ കൊച്ചി കൂട്ടായ്മയുടെ 2026-27 പ്രവര്ത്തന വര്ഷത്തേക്കുള്ള പുതിയ ഭാരവാഹികളെ തിരഞ്ഞെടുത്തു. റിയാദ് ലുഹാ ഓഡിറ്റോറിയത്തില് നടന്ന ജനറല് ബോഡി യോഗത്തിലാണ് 13 അംഗ എക്സിക്യൂട്ടീവ് കമ്മിറ്റിയെ തിരഞ്ഞെടുത്തത്. ഇരുപത്തിമൂന്ന് വര്ഷത്തെ പ്രവര്ത്തന പാരമ്പര്യമുള്ള സംഘടന, പുതിയ കമ്മിറ്റിയുടെ കീഴില് കൂടുതല് കരുത്തുറ്റ ജീവകാരുണ്യ പദ്ധതികളുമായി മുന്നോട്ട് പോകാന് തീരുമാനിച്ചു.
പുതിയ ഭാരവാഹികള്: പ്രസിഡന്റ്: രഞ്ജിത്ത് അനസ്, ജനറല് സെക്രട്ടറി: ജിനോഷ് അഷറഫ്, ട്രഷറര്: അഹ്സന് സമദ്, വൈസ് പ്രസിഡന്റ്: റഫീഖ്, ജോയിന്റ് സെക്രട്ടറി: ഷാജി ഹുസൈന് എന്നിവരേയും മറ്റ് ഭാരവാഹികളായി കെ.ബി. ഷാജി (ചാരിറ്റി കണ്വീനര്), ഷാജഹാന് (ട്രസ്റ്റ്), നിസാര് നെയ്ച്ചു (വെല്ഫെയര്), സാജിദ് (എം.എസ്.എഫ്), നിസാര് കൊച്ചിന് (ആര്ട്സ്), നിസാര് ഷംസു (സ്പോര്ട്സ്), ഹാഫിസ് മുഹമ്മദ് (പി.ആര്.ഒ), നിസാം സേട്ട് (ഇവന്റ് കണ്ട്രോളര്) എന്നിവരെയും തിരഞ്ഞെടുത്തു.
പ്രവാസ ജീവിതം അവസാനിപ്പിച്ച് നാട്ടിലേക്ക് മടങ്ങുന്ന സജീവ പ്രവര്ത്തകന് റബിയുള്ളയ്ക്ക് യോഗത്തില് യാത്രയയപ്പ് നല്കി. മുന് പ്രസിഡന്റ് കെ.ബി. ഷാജി അദ്ദേഹത്തിന് ഉപഹാരം സമര്പ്പിച്ചു. മികച്ച കണ്വീനര്ക്കുള്ള അവാര്ഡ് നിസാര് നെയ്ച്ചുവിനും, മികച്ച ബിസിനസ്സ് അവാര്ഡ് റിയാസ് സാഹിബിനും ചടങ്ങില് വിതരണം ചെയ്തു.
മുന് പ്രസിഡന്റ് കെ.ബി. ഷാജി അധ്യക്ഷത വഹിച്ച യോഗത്തില് ജിനോഷ് അഷറഫ് പ്രസൈഡിംഗ് ഓഫീസറായിരുന്നു. ഷാജഹാന്, ഷാജി ഹുസൈന് എന്നിവര് തിരഞ്ഞെടുപ്പ് നടപടികള് നിയന്ത്രിച്ചു. ഹാഫിസ് മുഹമ്മദ് സ്വാഗതവും ഷാജഹാന് നന്ദിയും പറഞ്ഞു.
ഇരുപത്തിമൂന്നാം വാര്ഷികത്തിന്റെ ഭാഗമായി റിയാദിലെ പ്രവാസി സമൂഹത്തിന് ഉപകാരപ്രദമായ ഒട്ടേറെ വൈവിധ്യമാര്ന്ന പരിപാടികള് സംഘടിപ്പിക്കുമെന്ന് പുതിയ ഭാരവാഹികള് അറിയിച്ചു. സംഘടനയുടെ മുഖ്യമുദ്രയായ ചാരിറ്റി പ്രവര്ത്തനങ്ങളില് നാട്ടിലും പ്രവാസ മണ്ണിലും കൂടുതല് ശ്രദ്ധ കേന്ദ്രീകരിക്കുമെന്നും നിര്ദ്ധനര്ക്ക് കൈത്താങ്ങാകാന് വ്യവസ്ഥാപിതമായ പദ്ധതികള് ആവിഷ്കരിക്കുമെന്നും കമ്മിറ്റി വ്യക്തമാക്കി.
Related News
