മസ്കത്ത്: റോഡിലെ അഭ്യാസപ്രകടനങ്ങളും നിയമലംഘനങ്ങളും സമൂഹമാധ്യമങ്ങളില് ആഘോഷമാക്കിയ പ്രവാസികള് ഒടുവില് പോലീസ് പിടിയില്. അപകടകരമായ രീതിയില് വാഹനമോടിക്കുകയും പൊതുജനസമാധാനം തടസ്സപ്പെടുത്തുകയും ചെയ്ത ഒരുകൂട്ടം ഏഷ്യന് പ്രവാസികളെയാണ് റോയല് ഒമാന് പോലീസ് അറസ്റ്റ് ചെയ്തത്.
വാഹനങ്ങള് ഉപയോഗിച്ച് അപകടകരമായ രീതിയില് അഭ്യാസപ്രകടനങ്ങള് നടത്തുന്നതിന്റെ ദൃശ്യങ്ങള് കഴിഞ്ഞ ദിവസങ്ങളില് സോഷ്യല് മീഡിയയില് വ്യാപകമായി പ്രചരിച്ചിരുന്നു. ഇത് ശ്രദ്ധയില്പ്പെട്ട റോയല് ഒമാന് പോലീസിന്റെ ട്രാഫിക് ജനറല് ഡയറക്ടറേറ്റ് ഉടന് അന്വേഷണം ആരംഭിക്കുകയും പ്രതികളെ തിരിച്ചറിഞ്ഞ് പിടികൂടുകയുമായിരുന്നു.
പിടിക്കപ്പെട്ടവര്ക്കെതിരെയുള്ള നിയമ നടപടികള് പൂര്ത്തിയായി വരികയാണെന്ന് അധികൃതര് അറിയിച്ചു. ഗതാഗത നിയമങ്ങള് ലംഘിക്കുന്നതും മറ്റ് യാത്രക്കാരുടെ ജീവന് ഭീഷണിയാകുന്ന രീതിയില് പെരുമാറുന്നതും ഗൗരവകരമായ കുറ്റകൃത്യമായാണ് ഒമാന് കാണുന്നത്.
'റോഡ് നിയമങ്ങള് പാലിക്കുന്നതില് യാതൊരു വിട്ടുവീഴ്ചയുമുണ്ടാകില്ല. സുരക്ഷാ മാനദണ്ഡങ്ങള് ലംഘിക്കുന്നവര്ക്കെതിരെ കര്ശനമായ പിഴയും തടവ് ശിക്ഷയും നാടുകടത്തല് ഉള്പ്പെടെയുള്ള നടപടികളും സ്വീകരിക്കും,' - റോയല് ഒമാന് പോലീസ് വ്യക്തമാക്കി.
സമൂഹമാധ്യമങ്ങളില് ശ്രദ്ധ നേടുന്നതിനായി ഇത്തരം നിയമലംഘനങ്ങള് നടത്തുന്നവര്ക്കെതിരെ നിരീക്ഷണം ശക്തമാക്കാനാണ് പോലീസിന്റെ തീരുമാനം.
Related News
