തിരുവനന്തപുരം: അഞ്ചാം ലോക കേരള സഭയോടനുബന്ധിച്ചുള്ള (2026 ജനുവരി 29-31) പൊതു സമ്മേളനത്തിന്റെയും ഓപ്പണ്‍ ഫോറത്തിന്റയും നടത്തിപ്പിനായി സംഘാടക സമിതി രൂപീകരിച്ചു. 2026 ജനുവരി 29ന് തിരുവനന്തപുരം നിശാഗന്ധി ഓഡിറ്റോറിയത്തില്‍ നടക്കുന്ന പൊതു സമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ജനുവരി 30 നാണ് ഓപ്പണ്‍ ഫോറം. ഇരു പരിപാടികളിലും പ്രവാസികളുടെ പ്രാതിനിധ്യം ഉറപ്പാക്കുന്നതിന്റെ ഭാഗമായിട്ടാണ് സംഘാടക സമിതി രൂപീകരണം.

നോര്‍ക്ക റസിഡന്റ് വൈസ് ചെയര്‍മാന്‍ പി ശ്രീരാമകൃഷ്ണന്‍, രാജ്യസഭാഗം പി.പി സുനീര്‍, വര്‍ക്കല എം.എല്‍.എ വി ജോയ് എന്നിവരാണ് രക്ഷാധികാരികള്‍. കേരളാ പ്രവാസി കേരളീയ ക്ഷേമ ബോര്‍ഡ് ചെയര്‍മാന്‍ അഡ്വ ഗഫൂര്‍ പി ലില്ലീസാണ് സ്വാഗതസംഘം ചെയര്‍മാന്‍. കൈയ്പ്പമംഗലം എം.എല്‍.എ ഇ.ടി ടൈസണ്‍ മാസ്റ്റര്‍, പ്രവാസി ലീഗില്‍ നിന്നും ഹനീഫ മുന്നിയൂര്‍, പ്രവാസി കോണ്‍ഗ്രസ് പ്രതിനിധി ദിനേശ് ചന്ദന, കേരള പ്രവാസി സംഘത്തില്‍ ബാദുഷ കടലുണ്ടി എന്നിവരെ വൈസ് ചെയര്‍മാായിന്‍മാരായും തിരഞ്ഞെടുത്തു. കേരളാ പ്രവാസി കേരളീയ ക്ഷേമ ബോര്‍ഡ് ഡയറക്ടര്‍ ബോര്‍ഡ് അംഗം സജീവ് തൈക്കാടാണ് കണ്‍വീനര്‍. പ്രവാസി പ്രദേശ് കോണ്‍ഗ്രസ് പ്രതിനിധി എല്‍ വി അജയകുമാര്‍, പ്രവാസി കോണ്‍ഗ്രസ്സില്‍ നിന്നും സലിം പള്ളിവിള, കേരള പ്രവാസി സംഘം പ്രതിനിധി ബി. എല്‍ അനില്‍കുമാര്‍ എന്നിവരെ ജോയിന്റ് കണ്‍വീനര്‍മാരായും യോഗം തിരഞ്ഞെടുത്തു.

പി ശ്രീരാമകൃഷ്ണന്റെ അധ്യക്ഷതയില്‍ ചേര്‍ന്ന യോഗത്തില്‍ നോര്‍ക്ക വകുപ്പ് സ്‌പെഷ്യല്‍ സെക്രട്ടറി അനുപമ ടിവി, ലോക കേരള സഭ ഡയറക്ടര്‍ ആസിഫ് കെ യൂസഫ്, നോര്‍ക്ക റൂട്ട്‌സ് സിഇഒ അജിത്ത് കോളശ്ശേരി, പത്തോളം പ്രവാസി സംഘടനാ പ്രതിനിധികള്‍ എന്നിവര്‍ പങ്കെടുത്തു. 2026 ജനുവരി 30, 31 തീയതികളില്‍ കേരള നിയമസഭാ മന്ദിരത്തിലെ ആര്‍ ശങ്കരനാരായണന്‍ തമ്പി ഹാളിലാണ് ലോക കേരള സഭ ചേരുക.