ജുബൈല്: ജനുവരി 30 ന് നടക്കാനിരിക്കുന്ന ഫാമിലി കോണ്ഫറന്സ് പ്രചാരണോദ്ഘാടനം നൂറുദ്ദീന് സ്വലാഹി മദീന നിര്വ്വഹിച്ചു. കുടുംബ സംവിധാനങ്ങളില് വിള്ളല് വരുത്താനുള്ള ബോധപൂര്വ്വമായ ശ്രമങ്ങള് തിരിച്ചറിയണമെന്നും കുടുംബങ്ങളുടെ തകര്ച്ച സമൂഹത്തിന്റെ കെട്ടുറപ്പിനെ ബാധിക്കുമെന്നും ജുബൈല് ഇന്ത്യന് ഇസ്ലാഹി സെന്റര് ഓഡിറ്റോറിയത്തില് നടന്ന പരിപാടിയില് നൂറുദ്ദീന് സ്വലാഹി ഉദ്ബോധിപ്പിച്ചു. കൃത്യമായ ലക്ഷ്യബോധത്തോടെ ചിട്ടയുള്ള ജീവിത ക്രമമാണ് ഇസ്ലാം മുന്നോട്ടു വെക്കുന്നതെന്നും കുടുംബത്തെ ചേര്ത്തു പിടിക്കാനുള്ള ശക്തമായ കല്പനകള് വിശുദ്ധ ഖുര്ആനിലും പ്രവാചകാധ്യാപനങ്ങളിലും ധാരാളമായി കാണാമെന്നും അദ്ദേഹം കൂട്ടിച്ചേര്ത്തു. കുടുംബത്തോടെ സ്വര്ഗ്ഗത്തിലേക്ക് എന്ന വിഷയത്തെ അധികരിച്ചു സംസാരിക്കുകയായിരുന്നു അദ്ദേഹം.
പ്രചരോണാദ്ഘാടന സമ്മേളനത്തില് ജുബൈല് ഇസ്ലാഹി യൂത്ത് പ്രസിഡന്റ് മുഹമ്മദ് നിയാസ് ആമുഖ ഭാഷണം നടത്തി. ദഅവ കണ്വീനര് ഹിഷാം അബൂബക്കര് നിയന്ത്രിച്ചു. സമ്മേളനത്തിന്റെ മുന്നോടിയായി നടത്താന് ഉദ്ദേശിക്കുന്ന വിവിധ പ്രചാരണ പരിപാടികള് സുബുഹാന് സ്വലാഹി വിശദീകരിച്ചു.
ടീന്സ് മീറ്റ്, വനിതാ സമ്മേളനം, യൂത്ത് മീറ്റ് തുടങ്ങിയ വിവിധ തലങ്ങളിലുള്ള പരിപാടികള്ക്ക് തുടക്കമായി.
Related News
