മസ്‌കത്ത്: വെനസ്വേലയിലെ രാഷ്ട്രീയ സാഹചര്യങ്ങളുടെ പശ്ചാത്തലത്തില്‍ രാജ്യത്തിന് പൂര്‍ണ്ണ പിന്തുണയും ഐക്യദാര്‍ഢ്യവും പ്രഖ്യാപിച്ച് ഒമാന്‍. വെനസ്വേലന്‍ ജനതയുടെ നിയമാനുസൃതമായ തെരഞ്ഞെടുപ്പുകളെയും താല്‍പ്പര്യങ്ങളെയും അന്താരാഷ്ട്ര സമൂഹം ബഹുമാനിക്കണമെന്ന് ഒമാന്‍ വിദേശകാര്യ മന്ത്രാലയം പ്രസ്താവനയിലൂടെ ആവശ്യപ്പെട്ടു.

രാജ്യത്തിന്റെ സുരക്ഷയ്ക്കും ആഭ്യന്തര സ്ഥിരതയ്ക്കുമാണ് ഏറ്റവും മുന്‍ഗണന നല്‍കേണ്ടത്. പൗരന്മാരുടെ സുരക്ഷ ഉറപ്പാക്കുന്നതിനൊപ്പം സമാധാനപരമായ അന്തരീക്ഷം നിലനിര്‍ത്താന്‍ എല്ലാവരും സഹകരിക്കണമെന്നും ഒമാന്‍ അഭ്യര്‍ത്ഥിച്ചു.

ആഗോളതലത്തില്‍ സമാധാനവും സുരക്ഷയും ഉറപ്പുവരുത്തുന്നതിനായി ഐക്യരാഷ്ട്രസഭ (UN) നടത്തുന്ന എല്ലാവിധ നീക്കങ്ങള്‍ക്കും ഒമാന്‍ തങ്ങളുടെ പൂര്‍ണ്ണ പിന്തുണ അറിയിച്ചിട്ടുണ്ട്. പ്രാദേശികവും അന്തര്‍ദേശീയവുമായ പ്രശ്‌നങ്ങളില്‍ സുല്‍ത്താനേറ്റ് പുലര്‍ത്തുന്ന സമാധാനപരമായ നയതന്ത്ര നിലപാടിന്റെ ഭാഗമായാണ് ഈ പ്രതികരണം.