ലണ്ടന്‍: കുട്ടികളിലെ അമിതവണ്ണം തടയുന്നതിനുള്ള കര്‍ശന നടപടികളുടെ ഭാഗമായി ജങ്ക് ഫുഡ് പരസ്യങ്ങള്‍ക്ക് ബ്രിട്ടനില്‍ നിരോധം ഏര്‍പ്പെടുത്തി. തിങ്കളാഴ്ച മുതല്‍ പുതിയ നിയമം നിലവില്‍ വന്നു. പകല്‍ സമയങ്ങളില്‍ ടെലിവിഷനിലും ഓണ്‍ലൈന്‍ പ്ലാറ്റ്ഫോമുകളിലും കൊഴുപ്പ്, ഉപ്പ്, പഞ്ചസാര എന്നിവ അമിതമായടങ്ങിയ ഭക്ഷണ പദാര്‍ഥങ്ങളുടെ പരസ്യങ്ങള്‍ നല്‍കുന്നതിനാണ് വിലക്ക്.

രാത്രി 9 മണിക്ക് മുമ്പ് ടെലിവിഷനില്‍ ജങ്ക് ഫുഡ് പരസ്യങ്ങള്‍ നല്‍കാന്‍ പാടില്ല. ഓണ്‍ലൈന്‍ മാധ്യമങ്ങളില്‍ ഇത്തരം പരസ്യങ്ങള്‍ക്ക് പൂര്‍ണ്ണ നിരോധമാണ് ഏര്‍പ്പെടുത്തിയിരിക്കുന്നത്.
ഈ നീക്കത്തിലൂടെ കുട്ടികളുടെ ഭക്ഷണക്രമത്തില്‍ നിന്ന് പ്രതിവര്‍ഷം ഏകദേശം 720 കോടി കലോറി ഒഴിവാക്കാന്‍ സാധിക്കുമെന്നാണ് ആരോഗ്യ മന്ത്രാലയത്തിന്റെ കണക്കുകൂട്ടല്‍. ഏകദേശം 20,000 കുട്ടികളെയെങ്കിലും അമിതവണ്ണത്തില്‍നിന്ന് രക്ഷിക്കാനും, ആരോഗ്യമേഖലയില്‍ ഏകദേശം 200 കോടി പൗണ്ടിന്റെ (ഏകദേശം 21,000 കോടി രൂപ) സാമ്പത്തിക നേട്ടമുണ്ടാക്കാനും ഇത് സഹായിക്കും.

ജങ്ക് ഫുഡ് നിരോധത്തിന് പുറമെ, പഞ്ചസാരയുടെ അളവ് കൂടുതലുള്ള റെഡി-ടു-ഡ്രിങ്ക് കോഫി, മില്‍ക്ക് ഷേക്ക്, സ്വീറ്റന്‍ഡ് തൈര് എന്നിവയ്ക്കും ഷുഗര്‍ ടാക്‌സ് വര്‍ദ്ധിപ്പിച്ചിട്ടുണ്ട്. കൂടാതെ, സ്‌കൂളുകള്‍ക്ക് സമീപം ഫാസ്റ്റ് ഫുഡ് കടകള്‍ ആരംഭിക്കുന്നത് തടയാന്‍ പ്രാദേശിക അധികാരികള്‍ക്ക് കൂടുതല്‍ അധികാരം നല്‍കി.

പരസ്യങ്ങള്‍ കുട്ടികളുടെ ഭക്ഷണശീലങ്ങളെ സ്വാധീനിക്കുന്നുവെന്ന് സര്‍ക്കാര്‍ വ്യക്തമാക്കുന്നു. കണക്കുകള്‍ പ്രകാരം, ഇംഗ്ലണ്ടില്‍ പ്രൈമറി സ്‌കൂളില്‍ എത്തുന്ന അഞ്ചു വയസ്സുകാരില്‍ 22 ശതമാനം പേരും അമിതവണ്ണമുള്ളവരാണ്. ഇത് ഹൈസ്‌കൂള്‍ പ്രായമെത്തുമ്പോഴേക്കും മൂന്നിലൊന്നായി വര്‍ദ്ധിക്കുന്നു. കൂടാതെ, ടൈപ്പ് 2 പ്രമേഹവും ദന്തരോഗങ്ങളും കുട്ടികളില്‍ വര്‍ദ്ധിച്ചു വരുന്നതും ആശങ്കയുണ്ടാക്കുന്നു.

'അസുഖങ്ങള്‍ ചികിത്സിക്കുന്നതിനോടൊപ്പം തന്നെ അവ തടയുന്നതിനും പ്രാധാന്യം നല്‍കുന്ന ആരോഗ്യനയത്തിന്റെ ഭാഗമാണിതെന്ന്' ആരോഗ്യ മന്ത്രി ആഷ്ലി ഡാല്‍ട്ടണ്‍ പറഞ്ഞു. ഒബിസിറ്റി ഹെല്‍ത്ത് അലയന്‍സ്, ഡയബറ്റിസ് യുകെ തുടങ്ങിയ സംഘടനകള്‍ സര്‍ക്കാരിന്റെ തീരുമാനത്തെ സ്വാഗതം ചെയ്തു.