ജിദ്ദ: ഇന്ത്യന്‍ ഡോക്ടേഴ്‌സ് മെഡിക്കല്‍ ഫോറം (IDMF) ഇന്ത്യന്‍ സമൂഹത്തിന് വേണ്ടി വീണ്ടും ആരോഗ്യമുന്നേറ്റവുമായി രംഗത്തെത്തുന്നു. സേവനത്തെ തങ്ങളുടെ ഉത്തരവാദിത്വമായി കണക്കാക്കുന്ന IDMF, ജനുവരി 11 മുതല്‍ 15 വരെ 'School Health Awareness Camp' എന്ന പേരില്‍ പ്രത്യേക ദന്ത മെഡിക്കല്‍ ക്യാമ്പ് സംഘടിപ്പിക്കുന്നു.

ജിദ്ദയിലെ ഇന്ത്യന്‍ വിദ്യാര്‍ത്ഥികളുടെ ദന്താരോഗ്യം സംരക്ഷിക്കുകയും പുഞ്ചിരികള്‍ ആരോഗ്യകരമാക്കുകയും ചെയ്യുക എന്ന ലക്ഷ്യത്തോടെ സംഘടിപ്പിക്കുന്ന ക്യാമ്പില്‍, 25 പരിചയസമ്പന്നരായ ഡോക്ടര്‍മാരുടെ സേവനം ലഭ്യമാകും. ചികിത്സയ്‌ക്കൊപ്പം ദന്താരോഗ്യബോധവല്‍ക്കരണവും പ്രധാന പരിഗണനയായി ക്യാമ്പ് ലക്ഷ്യമിടുന്നു.

കോണ്‍സല്‍ ജനറല്‍ ഫഹദ് അഹമ്മദ് ഖാന്‍ സൂരിയുടെ പിന്തുണയോടെയും ഇന്ത്യന്‍ കോണ്‍സുലേറ്റിന്റെ സഹകരമത്തോടെ 'Fit India Movement' മുദ്രാവാക്യത്തിന്റെ ഭാഗമായി സംഘടിപ്പിക്കുന്ന ദന്ത ക്യാമ്പ്, വിദ്യാര്‍ത്ഥികള്‍ക്ക് പ്രൊഫഷണല്‍ ദന്തപരിശോധനയും നിര്‍ദ്ദേശങ്ങളും ലഭ്യമാക്കുന്ന അപൂര്‍വ അവസരമായിരിക്കും. ഒരുക്കങ്ങളുടെ ഭാഗമായി അധ്യാപകര്‍ക്ക് ഡോക്ടര്‍മാര്‍ ഇതിനകം ഓണ്‍ലൈന്‍ പരിശീലന ക്ലാസുകള്‍ നല്‍കി.

പങ്കെടുക്കുന്ന വിദ്യാര്‍ത്ഥികള്‍ക്ക് ആത്മവിശ്വാസം വര്‍ധിപ്പിക്കുന്നതോടൊപ്പം ദന്താരോഗ്യപരിചരണത്തില്‍ ഗുണാത്മക ബോധവല്‍ക്കരണവും നല്‍കുന്നു. ഏകദേശം ആറായിരത്തോളം വിദ്യാര്‍ത്ഥികള്‍ക്ക് സൗജന്യ ഉപദേശങ്ങളും അടിസ്ഥാന ദന്തപരിശോധനകളും പല്ലുകളുടെയും ചുണ്ടുകളുടെയും ആരോഗ്യം സംരക്ഷിക്കുന്നതിന് ആവശ്യമായ നിര്‍ദ്ദേശങ്ങളും ലഭ്യമാകും.

ഈ മഹത്തായ അവസരം പരമാവധി പ്രയോജനപ്പെടുത്താനും ഡെന്റല്‍ കിറ്റ് സ്വീകരിക്കാനും എല്ലാ വിദ്യാര്‍ത്ഥികളെയും IDMF ക്ഷണിച്ചു. ഏകതയും കരുതലും കൈമുതലാക്കി, കുട്ടികള്‍ക്കും സമൂഹത്തിനുമായി ആരോഗ്യത്തോടെ തെളിയുന്ന പുഞ്ചിരികള്‍ സൃഷ്ടിക്കുക എന്നതാണ് IDMF-ന്റെ ലക്ഷ്യം.