മദീന: കഴിഞ്ഞ ദിവസം മദീനക്ക് സമീപമുണ്ടായ വാഹനാപകടത്തില് പരിക്കേറ്റ് ചികിത്സയിലായിരുന്ന ഒമ്പത് വയസ്സുകാരി ഹാദിയ ഫാത്തിമ മരിച്ചു. ഇതോടെ അപകടത്തില് മരിച്ച മലപ്പുറം സ്വദേശികളായ ഒരു കുടുംബത്തിലെ അംഗങ്ങളുടെ എണ്ണം അഞ്ചായി. മലപ്പുറം മഞ്ചേരി വെള്ളില യു.കെ പടി സ്വദേശി നടുവത്ത് കളത്തില് അബ്ദുല് ജലീലിന്റെ മകളാണ് ഹാദിയ.
അപകടത്തില് മരിച്ച അബ്ദുല് ജലീല് (52), ഭാര്യ തസ്ന (40), മകന് ആദില് (14), ജലീലിന്റെ മാതാവ് മൈമൂനത്ത് (73) എന്നിവരുടെ ഖബറടക്കം ബുധനാഴ്ച മദീനയില് നടന്നിരുന്നു. മസ്ജിദുന്നബവിയില് ആയിരക്കണക്കിന് വിശ്വാസികള് പങ്കെടുത്ത മയ്യിത്ത് നമസ്കാരത്തിന് ശേഷം ജന്നത്തുല് ബഖീഇലാണ് ഇവരെ ഖബറടക്കിയത്. ഈ ചടങ്ങുകള് കഴിഞ്ഞ് മണിക്കൂറുകള് പിന്നിടുമ്പോഴാണ് ആശുപത്രിയില് തീവ്രപരിചരണ വിഭാഗത്തിലായിരുന്ന ഹാദിയയും മരണത്തിന് കീഴടങ്ങിയത്.
കുടുംബം സഞ്ചരിച്ചിരുന്ന വാഹനം അപകടത്തില്പ്പെട്ടതിനെത്തുടര്ന്ന് ജലീലിന്റെ മക്കളായ ഹാദിയയും ആയിഷയും നൂറയും ചികിത്സയിലായിരുന്നു. ഇതില് ഏഴ് വയസ്സുകാരി നൂറ ആശുപത്രി വിട്ടു. ആയിഷ ചികിത്സയില് തുടരുകയാണ്. ഉംറ തീര്ത്ഥാടനത്തിന് ശേഷം മദീന സിയാറത്ത് കഴിഞ്ഞ് മടങ്ങുമ്പോഴായിരുന്നു നാടിനെ നടുക്കിയ ഈ ദുരന്തം സംഭവിച്ചത്. ഒരേ കുടുംബത്തിലെ അഞ്ചുപേരുടെ വേര്പാട് പ്രവാസി സമൂഹത്തിനിടയിലും ജന്മനാട്ടിലും വലിയ നോവായി മാറിയിരിക്കുകയാണ്.
Related News
