റിയാദ് - മെട്രോ ശൃംഖലയുടെ വിപുലീകരണത്തിന്റെ ഭാഗമായി റെഡ് ലൈന്‍ നീട്ടുന്നതിനുള്ള കരാറിന് റോയല്‍ കമ്മീഷന്‍ ഫോര്‍ റിയാദ് സിറ്റി അംഗീകാരം നല്‍കി. നിലവിലെ പാതയില്‍ 8.4 കിലോമീറ്റര്‍കൂടി കൂട്ടിച്ചേര്‍ക്കുന്ന ഈ പദ്ധതി തലസ്ഥാനത്തെ പൊതുഗതാഗത സംവിധാനം കൂടുതല്‍ ശക്തമാക്കും.

കിംഗ് സൗദ് സര്‍വ്വകലാശാലയില്‍ നിന്ന് തുടങ്ങി ദിരിയ ഗേറ്റ് വികസന പദ്ധതി വരെയാണ് പുതിയ പാത നീളുന്നത്. ദൂരം: 8.4 കിലോമീറ്റര്‍. അഞ്ച് പുതിയ സ്റ്റേഷനുകള്‍ ഇതിന്റെ ഭാഗമായി നിര്‍മ്മിക്കും. 7.1 കിലോമീറ്റര്‍ ഭൂഗര്‍ഭ തുരങ്കങ്ങളിലൂടെയും 1.3 കിലോമീറ്റര്‍ ഉയര്‍ത്തിയ പാതയിലൂടെയുമാണ് മെട്രോ കടന്നുപോകുന്നത്. ഏകദേശം 6 വര്‍ഷത്തിനുള്ളില്‍ പദ്ധതി പൂര്‍ത്തിയാക്കാനാണ് ലക്ഷ്യമിടുന്നത്.

കിംഗ് സൗദ് സര്‍വ്വകലാശാലയിലെ രണ്ട് സ്റ്റേഷനുകളില്‍ ഒന്ന് മെഡിക്കല്‍ സിറ്റിക്കും ഹെല്‍ത്ത് കോളേജുകള്‍ക്കും വേണ്ടിയും രണ്ടാമത്തേത് സര്‍വ്വകലാശാലയുടെ പ്രധാന ഭാഗങ്ങള്‍ക്കും വേണ്ടിയുമായിരിക്കും. ദിരിയ മേഖലയിലെ പ്രധാന സാംസ്‌കാരിക കേന്ദ്രങ്ങളെ ബന്ധിപ്പിച്ചുകൊണ്ടുള്ളതാണ് മൂന്ന് സ്റ്റേഷനുകള്‍. ഇതിലൊന്ന് ഭാവിയില്‍ വരാനിരിക്കുന്ന ഏഴാം മെട്രോ ലൈനുമായുള്ള ഇന്റര്‍ചേഞ്ച് സ്റ്റേഷനായിരിക്കും.

പദ്ധതി പൂര്‍ത്തിയാകുന്നതോടെ റോഡുകളിലെ വാഹനങ്ങളുടെ എണ്ണത്തില്‍ പ്രതിദിനം 1,50,000 വരെ കുറവുണ്ടാകുമെന്ന് പ്രതീക്ഷിക്കുന്നു. കിംഗ് ഫഹദ് സ്‌പോര്‍ട്‌സ് സിറ്റിയില്‍ നിന്ന് ദിരിയയുടെ കേന്ദ്രഭാഗത്തേക്ക് വെറും 40 മിനിറ്റുകൊണ്ട് എത്താന്‍ സാധിക്കും. ദിരിയയിലെ പ്രധാന ടൂറിസ്റ്റ് കേന്ദ്രങ്ങളായ അല്‍-തുറൈഫ്, അല്‍-ബുജൈരി, ഓപ്പറ ഹൗസ് എന്നിവയെ മെട്രോ ശൃംഖലയുമായി ബന്ധിപ്പിക്കുന്നത് സന്ദര്‍ശകര്‍ക്കും താമസക്കാര്‍ക്കും വലിയ ഉപകാരമാകും.

2024 നവംബറില്‍ സല്‍മാന്‍ രാജാവ് ഉദ്ഘാടനം ചെയ്ത റിയാദ് മെട്രോ പദ്ധതിയുടെ തുടര്‍ച്ചയാണ് ഈ പുതിയ വിപുലീകരണം. 2024 അവസാനത്തോടെ പ്രവര്‍ത്തനം ആരംഭിച്ച മെട്രോയില്‍ ഇതിനകം 17.3 കോടിയിലധികം യാത്രക്കാര്‍ യാത്ര ചെയ്തതായാണ് കണക്കുകള്‍. കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന്റെ നേരിട്ടുള്ള മേല്‍നോട്ടത്തിലാണ് റിയാദ് നഗരത്തിന്റെ ഈ വികസന കുതിപ്പ്.

നിര്‍മ്മാണ പ്രവര്‍ത്തനങ്ങള്‍ക്കിടയില്‍ ഗതാഗതക്കുരുക്ക് ഒഴിവാക്കാന്‍ സര്‍വ്വകലാശാലാ പരിസരത്തും ദിരിയയിലും പ്രത്യേക ട്രാഫിക് ഡൈവേര്‍ഷന്‍ പ്ലാനുകള്‍ കമ്മീഷന്‍ നടപ്പിലാക്കും.