ജിദ്ദ- ആത്മവിശ്വാസത്തോടെയുള്ള ആശയവിനിമയത്തിന്റെ വേദിയായി ലോകമെമ്പാടും അംഗീകരിക്കപ്പെട്ട ടോസ്റ്റ്മാസ്റ്റേഴ്‌സ് ക്ലബ് ജിദ്ദയിലും വന്‍ പ്രചാരം നേടുന്നു. ആശയവിനിമയശേഷി വികസിപ്പിക്കാന്‍ ലോകത്തെ 143-ലധികം രാജ്യങ്ങളില്‍ സജീവമായി പ്രവര്‍ത്തിക്കുന്ന അന്താരാഷ്ട്ര സംഘടനയാണ് ടോസ്റ്റ്മാസ്റ്റേഴ്‌സ് ഇന്റര്‍നാഷണല്‍. പരസ്പര സഹായവും സഹകരണവും മുഖേന അംഗങ്ങളുടെ കഴിവുകള്‍ വളര്‍ത്തുന്ന പ്രചോദനപരമായ കൂട്ടായ്മയുടെ ഭാഗമാകാനുള്ള അവസരമാണ് ടോസ്റ്റ്മാസ്റ്റേഴ്‌സ് വാഗ്ദാനം നല്‍കുന്നത്. ലോകത്തിന്റെ വിവിധ ഭാഗങ്ങളിലായി 16,800-ത്തിലധികം ക്ലബ്ബുകളിലായി 3,58,000-ത്തിലധികം അംഗങ്ങള്‍ നിലവില്‍ ടോസ്റ്റ്മാസ്റ്റേഴ്‌സിന്റെ ഭാഗമാണ്.

പൊതുപ്രഭാഷണത്തിലെ ഭയം കുറയ്ക്കുക, ആശയങ്ങള്‍ വ്യക്തവും ക്രമബദ്ധവുമായി അവതരിപ്പിക്കാന്‍ പരിശീലനം നല്‍കുക, ശരിയായ ശരീരഭാഷയും ശബ്ദ വിനിയോഗവും പരിശീലിക്കുക, സഭാകമ്പത്തെ കീഴടക്കി വേദിയില്‍ സംസാരിക്കാന്‍ പ്രാപ്തി നേടുക, നേതൃത്വഗുണം വളര്‍ത്തുക തുടങ്ങിയവയാണ് ടോസ്റ്റ്മാസ്റ്റേഴ്‌സിന്റെ ലക്ഷ്യങ്ങള്‍. അനുഭവസമ്പത്തുള്ള അംഗങ്ങളുടെ മാര്‍ഗനിര്‍ദേശങ്ങളോടെ, സുരക്ഷിതവും സൗഹൃദപരവുമായ അന്തരീക്ഷത്തിലാണ് എല്ലാ പരിശീലനങ്ങളും നടക്കുന്നത്.

ജിദ്ദയിലെ പ്രമുഖ മലയാളം ടോസ്റ്റ്മാസ്റ്റേഴ്‌സ് ക്ലബ്ബായ വാങ്മയം മലയാളം ടോസ്റ്റ് മാസ്റ്റേഴ്‌സ് ക്ലബ്ബിലേക്ക് ജിദ്ദയിലെ മലയാളികളെ സ്വാഗതം ചെയ്യുന്നതായി ക്ലബ് പ്രസിഡണ്ട് സഹീര്‍ പി അബ്ദുല്‍ ഖാദര്‍ അറിയിച്ചു. ക്ലബില്‍ അംഗങ്ങള്‍ ആവാന്‍ ആഗ്രഹിക്കുന്നവര്‍ പ്രസിഡണ്ടുമായി ബന്ധപ്പെടുക (ഫോണ്‍ നമ്പര്‍ 0506689568).

മറ്റു ഭാരവാഹികള്‍: വിദ്യാഭ്യാസ വിഭാഗം ഉപാധ്യക്ഷന്‍ വിജേഷ് വിജയന്‍, അംഗത്വ ഉപാധ്യക്ഷന്‍ സി എച്ച് ബഷീര്‍, പൊതുജന സമ്പര്‍ക്കം ഉപാധ്യക്ഷന്‍ മുഹമ്മദ് സാലി, സെക്രട്ടറി എം ടി മുഹമ്മദ്, ട്രഷറര്‍ പി പി ഫഹദ്, സെര്‍ജന്റ് അറ്റ് ആംസ് നൗഫല്‍ അബ്ദുല്‍ കരീം.

ഫോട്ടോ: സഹീര്‍ പി അബ്ദുല്‍ഖാദര്‍, സി.എച്ച് ബഷീര്‍, വിജേഷ് വിജയന്‍, മുഹമ്മദ് എം.ടി, നൗഫല്‍ കരീം, ഫഹദ് പി.പി, മുഹമ്മദ് സാലിഹ്.