റിയാദ്- റിയാദ് സീസണിന്റെ ആറാം പതിപ്പില് അഭൂതപൂര്വമായ ഒരു സംഗീത വിരുന്നിന് അരങ്ങൊരുങ്ങുന്നു. പ്രശസ്ത ലെബനീസ് താരം ഹൈഫ വഹ്ബിയും ഈജിപ്ഷ്യന് താരം അഹമ്മദ് സാദും സൗദി അറേബ്യയില് ആദ്യമായി ഒരു വേദിയില് ഒന്നിച്ചെത്തുന്നു എന്നതാണ് ഈ പരിപാടിയുടെ പ്രത്യേകത. ജനുവരി 23 നാണ് പരിപാടി. ടിക്കറ്റുകള് ഉടന് ലഭ്യമാകും.
റിയാദ് സീസണിന്റെ ഭാഗമായി നടക്കുന്ന ഈ പ്രത്യേക കലാസന്ധ്യക്കായി വലിയ ആവേശത്തോടെയാണ് ആരാധകര് കാത്തിരിക്കുന്നത്. റൊട്ടാന ഓഡിയോ വിഷ്വല് കമ്പനി ഔദ്യോഗിക പ്ലാറ്റ്ഫോമുകളിലൂടെ പരിപാടിയുടെ പ്രചാരണം ആരംഭിച്ചുകഴിഞ്ഞു. ആവേശവും ഊര്ജവും നിറഞ്ഞ ഒരു രാത്രിയായിരിക്കും ഇതെന്നും, അംഗീകൃത സെയില്സ് ഔട്ട്ലെറ്റുകള് വഴി ടിക്കറ്റുകള് ഉടന് പുറത്തിറക്കുമെന്നും സംഘാടകര് അറിയിച്ചു.
ജനുവരി 23-ലെ റിയാദ് കണ്സേര്ട്ടിന് മുന്നോടിയായി, ജനുവരി 15-ന് ബഹ്റൈനില് നടത്താനിരുന്ന തന്റെ സംഗീത പരിപാടി അഹമ്മദ് സാദ് റദ്ദാക്കി. തന്റെ നിയന്ത്രണത്തിന് അതീതമായ ചില കാരണങ്ങളാലാണ് പരിപാടി മാറ്റിവെച്ചതെന്ന് അദ്ദേഹം അറിയിച്ചു.
ഇക്കാര്യത്തില് ആരാധകരോട് ഖേദം പ്രകടിപ്പിച്ചുകൊണ്ട് അദ്ദേഹം ഇന്സ്റ്റാഗ്രാമില് കുറിപ്പ് പങ്കുവെച്ചു. ബഹ്റൈനിലെ ആരാധകരെ കാണാന് താന് ഏറെ ആഗ്രഹിച്ചിരുന്നുവെന്നും, വരും കാലങ്ങളില് ഇതിന് അവസരമുണ്ടാകുമെന്ന് പ്രതീക്ഷിക്കുന്നതായും അദ്ദേഹം വ്യക്തമാക്കി.
Related News
