മസ്‌കറ്റ്: ഒമാനില്‍ ശഅ്ബാന്‍ മാസപ്പിറവി ദൃശ്യമായതായി ഔഖാഫ്-മതകാര്യ മന്ത്രാലയം അറിയിച്ചു. തിങ്കളാഴ്ച വൈകുന്നേരം മാസപ്പിറവി ദൃശ്യമായ സാഹചര്യത്തില്‍ ജനുവരി 20 ചൊവ്വാഴ്ച ശഅ്ബാന്‍ മാസത്തിലെ ആദ്യ ദിനമായിരിക്കും.

ഔദ്യോഗിക കലണ്ടര്‍ പ്രകാരം ഇത്തവണ ശഅ്ബാന്‍ മാസം 30 ദിവസവും പൂര്‍ത്തിയാകാനാണ് സാധ്യത. ഇതനുസരിച്ച് വിശുദ്ധ റമദാന്‍ വ്രതാനുഷ്ഠാനത്തിന് ഫെബ്രുവരി 19 വ്യാഴാഴ്ച തുടക്കമാകുമെന്ന് പ്രതീക്ഷിക്കുന്നു.

ഒരു മാസം നീണ്ടുനില്‍ക്കുന്ന വ്രതാനുഷ്ഠാനത്തിന് ശേഷം ആഘോഷിക്കുന്ന ഈദുല്‍ ഫിത്തര്‍ (ചെറിയ പെരുന്നാള്‍) മാര്‍ച്ച് 19-നോ 20-നോ ആയിരിക്കാനാണ് സാധ്യതയെന്നും മന്ത്രാലയത്തിന്റെ കണക്കുകള്‍ സൂചിപ്പിക്കുന്നു. മാസപ്പിറവി കാണുന്നതിനനുസരിച്ച് റമദാന്‍, പെരുന്നാള്‍ തീയതികളില്‍ അന്തിമ തീരുമാനമുണ്ടാകും.

സൗദി അറേബ്യയിലും ഇന്ന് ശഅ്ബാന്‍ ഒന്നാണ്. ഇന്നലെ മാസപ്പിറവി ദൃശ്യമാകാത്തതിനാല്‍ റജബ് 30 പൂര്‍ത്തിയാക്കി ജനുവരി 20 ചൊവ്വാഴ്ച ശഅ്ബാന്‍ ഒന്നായിരിക്കുമെന്ന് സൗദി സുപ്രീം കോടതി അറിയിച്ചു.