ജിദ്ദ- കലാലയം സാംസ്‌കാരിക വേദി സംഘടിപ്പിക്കുന്ന 15-ാമത് എഡിഷന്‍ സൗദി വെസ്റ്റ് നാഷനല്‍ 'പ്രവാസി സാഹിത്യോത്സവ്' 2026 ജനുവരി 23 വെള്ളിയാഴ്ച മക്കയിലെ അല്‍ ജുമും അഫ്രഹ് അല്‍-അന്‍ദലസ് ഓഡിറ്റോറിയത്തില്‍ നടക്കുമെന്ന് സംഘാടക സമിതി ഭാരവാഹികള്‍ പത്രസമ്മേളനത്തില്‍ അറിയിച്ചു. പ്രശസ്ത എഴുത്തുകാരന്‍ ശിഹാബുദ്ദീന്‍ പൊയ്ത്തുംകടവ് പരിപാടി ഉദ്ഘാടനം ചെയ്യും.

ജിസാന്‍, അസീര്‍, അല്‍ബഹ, തായിഫ്, മക്ക, ജിദ്ദ സിറ്റി, ജിദ്ദ നോര്‍ത്ത്, മദീന, റാബിഖ്, യാമ്പു, തബൂക്ക് എന്നീ 11 സോണുകളില്‍ നിന്നായി 300-ഓളം പ്രതിഭകള്‍ മത്സരങ്ങളില്‍ മാറ്റുരയ്ക്കും. മാപ്പിളപ്പാട്ട്, ദഫ്മുട്ട്, പ്രസംഗങ്ങള്‍, കവിതാ പാരായണം, രിസാല റിവ്യൂ, അറബിക് കാലിഗ്രാഫി, കൊളാഷ്, കഥാ-കവിതാ രചന തുടങ്ങി 80-ഓളം ഇനങ്ങളില്‍ മത്സരങ്ങള്‍ നടക്കും.

ജൂനിയര്‍, സെക്കന്ററി, സീനിയര്‍, ജനറല്‍ തുടങ്ങി 14 കാറ്റഗറികളിലായി 12 സ്റ്റേജുകളിലായിട്ടാണ് മത്സരങ്ങള്‍ ക്രമീകരിച്ചിരിക്കുന്നത്. വൈകുന്നേരം ആറ് മണിക്ക് നടക്കുന്ന സാംസ്‌കാരിക സമ്മേളനത്തില്‍ രാഷ്ട്രീയ, സാമൂഹിക രംഗത്തെ പ്രമുഖര്‍ പങ്കെടുക്കും.

ഭിന്നശേഷിക്കാരായ കുട്ടികള്‍ക്കായി 'സ്‌നേഹോത്സവവും', സ്ത്രീകള്‍ക്കായി 'ഒരിടത്ത്' എന്ന സാഹിത്യ സംഗമവും ഇതിനോടനുബന്ധിച്ച് നടക്കും. സാംസ്‌കാരിക കോര്‍ണറില്‍ മുഹമ്മദലി പുത്തൂര്‍, ലുക്മാന്‍ വിളത്തൂര്‍, ജാബിറലി പത്തനാപുരം തുടങ്ങിയവര്‍ സാഹിത്യ സംവാദങ്ങള്‍ നയിക്കും.

വാര്‍ത്താ സമ്മേളനത്തില്‍ ഷാഫി ബാഖവി (സംഘാടക സമിതി ചെയര്‍മാന്‍), ജമാല്‍ കക്കാട് (എക്‌സിക്യൂട്ടീവ് കണ്‍വീനര്‍), മന്‍സൂര്‍ ചുണ്ടമ്പറ്റ (സെക്രട്ടറി, RSC ഗ്ലോബല്‍), ഉമൈര്‍ വയനാട് (ജനറല്‍ സെക്രട്ടറി, RSC സൗദി വെസ്റ്റ്), ഷബീറലി തങ്ങള്‍, റഫീഖ് കൂട്ടായി എന്നിവര്‍ പങ്കെടുത്തു.