റിയാദ്: സൗദിയിലെ അല്‍ ഉലാ ട്രെയില്‍ റേസ് ജനുവരി 22 മുതല്‍ 23 വരെ നടക്കും. അല്‍ ഉലായുടെ പ്രകൃതിദൃശ്യങ്ങള്‍ കണ്ട് വെല്ലുവിളികള്‍ നിറഞ്ഞ പുരാതന പൈതൃക സ്ഥലങ്ങളിലൂടെ ഓടാനുള്ള അവസരമാണ് റേസിലൂടെ ലഭിക്കുക. വിവിധ വിഭാഗങ്ങള്‍ക്കായി നിരവധി മത്സരങ്ങളാണ് 2026 പതിപ്പിലുള്ളത്. ആദ്യമായി ഓടുന്നവര്‍ മുതല്‍ വിദഗ്ധ അത്ലറ്റുകള്‍ വരെയുള്ളവര്‍ പങ്കെടുക്കുന്നുണ്ട്.

അഞ്ച് മുതല്‍ 12 വയസ് വരെ പ്രായമുള്ള കുട്ടികള്‍ക്കുള്ള സണ്‍സെറ്റ് റേസ്, കിഡ്സ് റണ്‍ (1.6 കിലോമീറ്റര്‍), 13 വയസ്സും അതില്‍ കൂടുതലുമുള്ള ഓട്ടക്കാര്‍ക്കുള്ള റണ്‍ (3 കിലോമീറ്റര്‍), ജനറല്‍ വിഭാഗത്തിന് 10 കിലോമീറ്റര്‍ ട്രയല്‍ റണ്‍, കൂടുതല്‍ പരിചയസമ്പന്നരായ അത്ലറ്റുകള്‍ക്ക് 50 കിലോമീറ്റര്‍ റേസ്, ഏറ്റവും സ്ഥിരതയുള്ളതും വൈദഗ്ധ്യമുള്ളതുമായ ഓട്ടക്കാര്‍ക്കായി 100 കിലോമീറ്റര്‍ റേസ് എന്നിങ്ങനെയാണ് റേസുകള്‍.

എല്ലാ റൂട്ടുകളും ഓള്‍ഡ് ടൗണിലാണ് അവസാനിക്കുക. 50 കിലോമീറ്റര്‍ ഓട്ടത്തോടെയാണ് റേസ് ആരംഭിക്കുന്നത്. കുട്ടികളുടെ ഓട്ടം, കായിക പ്രകടനങ്ങള്‍ എന്നിവയും നടക്കും. നാളെയാണ് 100 കിലോമീറ്റര്‍ ഓട്ടം നടക്കുക, തുടര്‍ന്ന് 10 കിലോമീറ്റര്‍ ഓട്ടവും നടക്കും, അവാര്‍ഡ് ദാന ചടങ്ങും മെഡല്‍ വിതരണവും തുടര്‍ന്ന് നടക്കും.