ജിദ്ദ: കണ്ണമംഗലം സൗദി പ്രവാസി കൂട്ടായ്മയുടെ ആഭിമുഖ്യത്തിൽ സംഘടിപ്പിക്കുന്ന മൂന്നാമത് ഫുട്ബോൾ ടൂർണമെന്റ് നാളെ (വെള്ളിയാഴ്ച) ജിദ്ദ ശാറ ഫലസ്തീനിലെ അൽ വാഹ സ്റ്റേഡിയത്തിൽ നടക്കും. അബീർ മെഡിക്കൽ ഗ്രൂപ്പ് സ്പോൺസർ ചെയ്യുന്ന വിന്നേഴ്സ് ട്രോഫിക്കും, ഹിലാൽ ഫുഡ്സ്റ്റഫ് & കോൾഡ്സ്റ്റോർ നൽകുന്ന റണ്ണേഴ്സ് ട്രോഫിക്കും വേണ്ടിയാണ് ടീമുകൾ മാറ്റുരയ്ക്കുന്നത്.

ടൂർണമെന്റിന് മുന്നോടിയായുള്ള ട്രോഫി പ്രകാശനവും ഫിക്സർ നറുക്കെടുപ്പും കഴിഞ്ഞ ദിവസം (21/01/2026, ബുധൻ) നടന്നു. അബീർ മെഡിക്കൽ ഗ്രൂപ്പ് പ്രതിനിധി മുഹമ്മദ് ഷഫീഖ് കുഞ്ഞാലി ട്രോഫി പ്രകാശനം നിർവഹിച്ചു. മജീദ് ചേറൂർ ചടങ്ങിൽ അധ്യക്ഷത വഹിച്ചു.

ജൂനിയർ, വെറ്ററൻസ് വിഭാഗങ്ങളിലായി നാല് വീതം ടീമുകളാണ് ടൂർണമെന്റിൽ പങ്കെടുക്കുന്നത്. ജൂനിയർ വിഭാഗം ആദ്യ റൌണ്ടിൽ സോക്കർ എഫ്.സി, അമിഗോസ് എഫ്.സിയെയും ഐ.ഐ.എസ്.ജെ (IISJ), ജെ.എസ്.സി (JSC) എഫ്.സിയെയും നേരിടും.

വെറ്ററൻസ് വിഭാഗം ആദ്യ റൌണ്ടിൽ ഹീറോസ് എഫ്.സിയും ഫ്രൈഡേ എഫ്.സിയും തമ്മിലാണ് ആദ്യ മത്സരം. രണ്ടാം മത്സരത്തിൽ ഫുഡ് മോഡേൺ എഫ്.സി, അൽ മാസ് എഫ്.സിയെ നേരിടും.

ഫിക്സർ നറുക്കെടുപ്പിന് ഷെരീഫ് കെ.സി, സലാഹുദ്ധീൻ വാളക്കുട എന്നിവർ നേതൃത്വം നൽകി. ജലീൽ കണ്ണമംഗലം, ഇല്ല്യാസ് കണ്ണമംഗലം തുടങ്ങിയവർ ചടങ്ങിൽ ആശംസകൾ നേർന്നു.

നാളെ വൈകിട്ട് 6 മണിക്ക് അൽ വാഹ സ്റ്റേഡിയത്തിൽ മത്സരങ്ങൾ ആരംഭിക്കുമെന്ന് സംഘാടകർ അറിയിച്ചു. പ്രവാസി കൂട്ടായ്മ ജനറൽ സെക്രട്ടറി അഷ്റഫ് ചുക്കൻ സ്വാഗതവും സിദ്ദീഖ് പുള്ളാട്ട് നന്ദിയും പറഞ്ഞു. കായികപ്രേമികൾ ഏവരും മത്സരം കാണാൻ എത്തണമെന്ന് ഭാരവാഹികൾ അഭ്യർത്ഥിച്ചു.