മക്ക: രിസാല സ്റ്റഡി സര്‍ക്കിളിന് കീഴിലുള്ള കലാലയം സാംസ്‌കാരിക വേദി സംഘടിപ്പിക്കുന്ന 15-ാമത് എഡിഷന്‍ സൗദി വെസ്റ്റ് നാഷനല്‍ പ്രവാസി സാഹിത്യോത്സവിന് മക്കയില്‍ തുടക്കമായി.

മക്ക അല്‍ജുമൂമിലെ അഫ്രഹ് അല്‍അന്ദലൂസ് ഓഡിറ്റോറിയത്തില്‍ നടന്ന പരിപാടി നാഷനല്‍ ചെയര്‍മാന്‍ നൗഫല്‍ മുസ്ലിയാരുടെ അധ്യക്ഷതയില്‍ സംഘാടക സമിതി ചെയര്‍മാന്‍ ഷാഫി ബാഖവി ഉദ്ഘാടനം ചെയ്തു. സാഹിത്യോത്സവ് സ്പന്ദനങ്ങള്‍ അറിയാനുള്ള വെബ്‌സൈറ്റിന്റെ ഉദ്ഘാടനം ഗ്ലോബല്‍ സെക്രട്ടറി അഫ്‌സല്‍ സഖാഫി നിര്‍വഹിച്ചു. നാഷനല്‍ ജനറല്‍ സെക്രട്ടറി ഉമൈര്‍ വയനാട് സ്വാഗതവും എക്‌സിക്യൂട്ടീവ് അംഗം നൗഫല്‍ മദാരി നന്ദിയും പറഞ്ഞു.

ഫാമിലി, യൂനിറ്റ് , സെക്ടര്‍, സോണ്‍ തലങ്ങളില്‍ മത്സരിച്ചു വിജയിച്ച 300ഓളം പ്രതിഭകളാണ് നാഷനല്‍ തലത്തില്‍ മാറ്റുരക്കുന്നത്. ജിസാന്‍, അസീര്‍, അല്‍ബഹ, തായിഫ്, മക്ക, ജിദ്ദ, മദീന, റാബഖ്, യാമ്പു, തബൂക്ക് തുടങ്ങി 11 സോണുകളെ പ്രതിനിധീകരിച്ചാണ് മത്സരികള്‍ എത്തുന്നത്.

12 വേദികളിലായി ജൂനിയര്‍, സെക്കന്ററി, സീനിയര്‍, ജനറല്‍ തുടങ്ങി 14 കാറ്റഗറികളിലായി 80ഓളം മത്സരങ്ങളാണ് ഇന്ന് നടക്കുന്നത്. മാപ്പിളപ്പാട്ട്, ദഫ്മുട്ട്, കവിതാ പാരായണം, വിവിധ ഭാഷാ പ്രസംഗങ്ങള്‍ എന്നിവയ്ക്കൊപ്പം വൈജ്ഞാനിക പ്രാധാന്യമുള്ള രിസാല റിവ്യൂ, എഡിറ്റര്‍ക്കൊരു കത്ത്, പ്രബന്ധ രചന എന്നിവയും സോഷ്യല്‍ ട്വീറ്റ്, അറബിക് കാലിഗ്രാഫി, സ്‌പോട്ട് മാഗസിന്‍, കൊളാഷ്, കവിത-കഥ രചനകള്‍, ഹൈക്കു തുടങ്ങിയ ആധുനിക സര്‍ഗ്ഗാത്മക ഇനങ്ങളും ഇതില്‍ ഉള്‍പ്പെടുന്നു.

വൈകീട്ട് ആറ് മണിക്ക് നടക്കുന്ന സാംസ്‌കാരിക സമ്മേളനം പ്രശസ്ത എഴുത്തുകാരന്‍ ശിഹാബുദ്ദീന്‍ പൊയ്ത്തുംകടവ് ഉദ്ഘാടനം ചെയ്യും. രാഷ്ട്രീയ, സാമൂഹിക, സാംസ്‌കാരിക രംഗത്തെ പ്രമുഖര്‍ ചടങ്ങില്‍ സംബന്ധിക്കും.