റിയാദ്- സൗദി മാധ്യമ രംഗത്തെ പ്രമുഖനും വിശുദ്ധ ഖുര്ആന് റേഡിയോയിലെ സുപരിചിത ശബ്ദവുമായ അബ്ദുല് കരീം ബിന് സാലിഹ് അല്-മുഖ് രിന് അന്തരിച്ചു. 'നൂര് അലാ അദ്ദര്ബ്', 'ഫതാവ' തുടങ്ങിയ ജനപ്രിയ പരിപാടികളിലൂടെ വര്ഷങ്ങളോളം ശ്രോതാക്കളുടെ മനസ്സില് ഇടംപിടിച്ച വ്യക്തിയായിരുന്നു അദ്ദേഹം. ഖബറടക്കം ഇന്ന് (ശനിയാഴ്ച) അസര് നമസ്കാരത്തിന് ശേഷം റിയാദിലെ അല്-രാജ്ഹി പള്ളിയില് നടക്കുമെന്ന് കുടുംബം അറിയിച്ചു.
കഴിഞ്ഞ ഡിസംബര് അവസാനം നടത്തിയ ശസ്ത്രക്രിയയെത്തുടര്ന്നുണ്ടായ ഗുരുതരമായ ആരോഗ്യപ്രശ്നങ്ങളാല് അദ്ദേഹം ചികിത്സയിലായിരുന്നു. ശസ്ത്രക്രിയക്ക് പിന്നാലെയുണ്ടായ സങ്കീര്ണ്ണതകള് ഹൃദയം, ശ്വാസകോശം, വൃക്ക എന്നിവയുടെ പ്രവര്ത്തനത്തെ ബാധിച്ചതിനെത്തുടര്ന്ന് തീവ്രപരിചരണ വിഭാഗത്തില് ചികിത്സയിലിരിക്കെയാണ് അന്ത്യം സംഭവിച്ചത്.
മുതിര്ന്ന പണ്ഡിതന്മാരുമായി ചേര്ന്ന് ഗൗരവമേറിയ കര്മ്മശാസ്ത്ര സംവാദങ്ങള് ലളിതമായ രീതിയില് അവതരിപ്പിക്കുന്നതില് അദ്ദേഹം വലിയ വൈദഗ്ധ്യം പുലര്ത്തിയിരുന്നു. അല്-മുഖ്രിന്റെ നിര്യാണത്തില് സഹപ്രവര്ത്തകരും ആരാധകരും സോഷ്യല് മീഡിയയിലൂടെ അനുശോചനം രേഖപ്പെടുത്തി. ഇസ്ലാമിക വിജ്ഞാന വ്യാപനത്തിനായി തന്റെ ശബ്ദവും ജീവിതവും മാറ്റിവെച്ച ഒരു മഹത് വ്യക്തിയെയാണ് സൗദി മാധ്യമ ലോകത്തിന് നഷ്ടമായിരിക്കുന്നത്.
Related News
