റിയാദ്- നഗരത്തിന്റെ വടക്കന് മേഖലയിലുള്ള അല്-സഹാഫ ഡിസ്ട്രിക്റ്റില് പ്രധാന ജലവിതരണ പൈപ്പ് പൊട്ടിയതിനെ തുടര്ന്ന് റോഡിന്റെ ഒരു ഭാഗം ഇടിഞ്ഞുതാഴ്ന്നു. എഞ്ചിനീയേഴ്സ് അതോറിറ്റി കെട്ടിടത്തിന് സമീപമാണ് അപകടമുണ്ടായത്. പൈപ്പ് പൊട്ടിയതിനെ തുടര്ന്ന് വന്തോതില് വെള്ളം ഒഴുകിയെത്തുകയും പ്രദേശത്ത് ഒരു 'തടാകം' രൂപപ്പെട്ടതുപോലെയുള്ള ദൃശ്യങ്ങള് സോഷ്യല് മീഡിയയില് പ്രചരിക്കുകയും ചെയ്തു.
ഒരു കെട്ടിടത്തിന്റെ നിര്മ്മാണ പ്രവര്ത്തനങ്ങളുടെ ഭാഗമായി നടന്ന മണ്ണെടുപ്പിനിടെയാണ് അപകടമുണ്ടായതെന്ന് അധികൃതര് വ്യക്തമാക്കി. നിര്മ്മാണ സ്ഥലത്തിന് സമാന്തരമായുള്ള റോഡിന് താഴെയുള്ള ഒരു പ്രധാന പൈപ്പ് ലൈന് നീക്കം ചെയ്തത് മറ്റ് അടിസ്ഥാന സൗകര്യങ്ങളെ ബാധിക്കുകയും പൈപ്പ് പൊട്ടാന് കാരണമാവുകയും ചെയ്തു.
റിയാദ് ഇന്ഫ്രാസ്ട്രക്ചര് പ്രോജക്ട്സ് സെന്റര് ഉടന് തന്നെ ഇടപെടുകയും സ്ഥിതിഗതികള് നിയന്ത്രണവിധേയമാക്കുകയും ചെയ്തു.
അപകടം നടന്ന ഉടന് തന്നെ ബന്ധപ്പെട്ട വകുപ്പുകള് എമര്ജന്സി പ്ലാനുകള് നടപ്പിലാക്കി. പൈപ്പ് പൊട്ടിയ ഭാഗം വേര്തിരിക്കുകയും സുരക്ഷാ നടപടികള് സ്വീകരിക്കുകയും ചെയ്തതിനാല് പൊതുജനങ്ങള്ക്കുള്ള ജല-വൈദ്യുതി സേവനങ്ങളെ ഇത് ബാധിച്ചിട്ടില്ലെന്ന് അധികൃതര് ഉറപ്പുനല്കി.
റിയാദ് മുനിസിപ്പാലിറ്റി, ട്രാഫിക് ഡയറക്ടറേറ്റ്, സൗദി ഇലക്ട്രിസിറ്റി കമ്പനി, നാഷണല് വാട്ടര് കമ്പനി എന്നിവരുടെ ഏകോപിത ഇടപെടലിനെ ഇന്ഫ്രാസ്ട്രക്ചര് പ്രോജക്ട്സ് സെന്റര് പ്രശംസിച്ചു.
Related News
