ദുബായ്: യു.എ.ഇ പരിസ്ഥിതി-കാലാവസ്ഥാ വ്യതിയാന മന്ത്രാലയത്തിന്റെ 'സസ്റ്റൈനബിലിറ്റി മേക്കേഴ്സ്' പുരസ്കാര തിളക്കത്തില് മലയാളി ഡോക്ടര്. തൃശൂര് സ്വദേശിയായ ഡോ. എം.എ ഷിയാദാണ് മികച്ച വെറ്ററിനറി ഡോക്ടര് വിഭാഗത്തില് ഈ അഭിമാന നേട്ടം സ്വന്തമാക്കിയത്.
ദുബായ് ജുമൈറ മന്ദാരിന് ഓറിയന്റല് ഹോട്ടലില് നടന്ന പ്രൗഢഗംഭീരമായ ചടങ്ങില് പരിസ്ഥിതി-കാലാവസ്ഥാ വ്യതിയാന മന്ത്രി ഡോ. ആമിന ബിന്ത് അബ്ദുര്റഹ്മാന് അല് ദാഹാകി പുരസ്കാരം സമ്മാനിച്ചു. 2022 മുതല് 2024 വരെയുള്ള കാലയളവില് അദ്ദേഹം കാഴ്ചവെച്ച നിസ്തുലമായ സേവനങ്ങളെ മുന്നിര്ത്തിയാണ് ഈ അംഗീകാരം.
മന്ത്രാലയത്തിന്റെ കീഴില് ഇതുവരെ അന്പതോളം പുരസ്കാരങ്ങള് ഡോ. ഷിയാദിനെ തേടിയെത്തിയിട്ടുണ്ട്. 'എക്സെപ്ഷണല് എംപ്ലോയി', 'സ്റ്റാര് ഓഫ് എംപ്ലോയി', 'യു ഡിസെര്വ് അവാര്ഡ്' എന്നിവ ഇതില് പ്രധാനപ്പെട്ടവയാണ്. നിലവില് യു.എ.ഇ വടക്കന് മേഖലയിലെ അല്ദാരാ ക്വാറന്റൈന് സെന്റര്, റാസല്ഖൈമ എയര്പോര്ട്ട് ക്വാറന്റൈന് സെന്റര് എന്നിവിടങ്ങളില് അനിമല് റിസോഴ്സ് സ്പെഷ്യലിസ്റ്റായി സേവനമനുഷ്ഠിച്ചു വരികയാണ് അദ്ദേഹം.
മണ്ണുത്തി വെറ്ററിനറി കോളജില് നിന്നാണ് അദ്ദേഹം ബി.വി.എസ്.സി ബിരുദം പൂര്ത്തിയാക്കിയത്. തുടര്ന്ന് എം.ബി.എയും വിവിധ പി.ജി ഡിപ്ലോമകളും കരസ്ഥമാക്കി. ആഗോള ഹ്യൂമന് പീസ് യൂണിവേഴ്സിറ്റിയില് നിന്ന് അദ്ദേഹത്തിന് ഓണററി ഡോക്ടറേറ്റും ലഭിച്ചിട്ടുണ്ട്, തൃശൂര് സ്വദേശി പരേതനായ അബ്ദുറഹ്മാന്റെയും നബീസയുടെയും മകനാണ്. റാക് ന്യൂ ഇന്ത്യന് സ്കൂള് അധ്യാപിക അഡ്വ. ശബ്ന ഷിയാദാണ് ഭാര്യ. സിയ ഷിയാദ്, മറിയം ഷിയാദ് എന്നിവര് മക്കളാണ്.
Related News
