റിയാദ്: സെന്റര് ഫോര് ഇന്ഫര്മേഷന് ആന്ഡ് ഗൈഡന്സ് ഇന്ത്യ (സിജി) റിയാദ് ചാപ്റ്ററിന്റെ നേതൃത്വത്തില് ''സിജിയെസ്റ്റ -26 ' എന്നപേരില് വാര്ഷിക കുടുംബ സംഗമം സംഘടിപ്പിച്ചു. ദിറാബ് ബ്ലൂപാര്ക്ക് ഇസ്തിറാഹയില് നടന്ന സംഗമത്തില് സിജി പ്രവര്ത്തകരും സഹകാരികളും കുടുംബാംഗങ്ങളും ഉള്പ്പെടെ നൂറിലധികം പേര് പങ്കെടുത്തു വിനോദവും വിജ്ഞാനവും കോര്ത്തിണക്കിയ പരിപാടികള് സംഗമത്തിന്റെ പ്രത്യേകതയായിരുന്നു
അമീര് ഖാന്, റിദ മുനീബ് , ആഷ്ന അമീര് എന്നിവര് നേതൃത്വം നല്കിയ ഔട്ട്ഡോര് സെഷനില് വിവിധ ടീമുകളായി വിഭജിച്ച് നിരവധി ടീം ബില്ഡിംഗ് ഗെയിമുകളും വടംവലി മത്സരവും നടത്തി. കുട്ടികളും മുതിര്ന്നവരും ഒരുപോലെ സജീവമായി പങ്കെടുത്ത പരിപാടികള് കുടുംബ സംഗമത്തെ കൂടുതല് ആസ്വാദ്യകരമാക്കി.
ഷഹാന അലിയുടെ നേതൃത്വത്തില് വൈകുന്നേരം നടന്ന സാംസ്കാരിക സന്ധ്യ സംഗമത്തിന് മാറ്റ് കൂട്ടി . സിജി വുമണ് കളക്ടീവ് അംഗങ്ങളുടെ ഒപ്പനയും സംഘഗാനവും, സിജി സി.എല്.പി ടീമിന്റെ ഫ്യൂഷന് ഡാന്സും, സിജി കുടുംബാംഗങ്ങളുടെ മക്കളുടെ വിവിധ കലാപരിപാടികളും ശ്രദ്ധേയമായി. റിയാദിലെ പ്രശസ്ത മുട്ടിപ്പാട്ട് കലാകാരന് ഉമര് ഫാറൂക്കിന്റെ നേതൃത്വത്തില് അവതരിപ്പിച്ച സംഗീതനിശ ആസ്വാദകരെ ആവേശം കൊള്ളിച്ചു.
സംഗമത്തിന് മുനീബ് ബി.എച്ച്, റഷീദലി, മുസ്തഫ മാനന്തേരി, അബ്ദുല് അസീസ് തങ്കയത്തില്, റിസ്വാന് , അബ്ദുല് നിസാര്, അബൂബക്കര് മഞ്ചേരി, സമീര് മാളിയേക്കല്, ഷീബ അസീസ്, ഷഹാന അലി, ഫെബിന നിസാര് എന്നിവര് നേതൃത്വം നല്കി.
Related News
