കോഴിക്കോട്; 2026 ഹജ്ജിന് കേരളത്തില്‍ നിന്നും യാത്രയാകുന്ന ഹാജിമാര്‍ക്കായി കൊച്ചി, കണ്ണൂര്‍ എംബാര്‍ക്കേഷന്‍ പോയിന്റുകളില്‍ നിന്നുള്ള ഫ്ളൈറ്റ് ഷെഡ്യുള്‍ പ്രസിദ്ധീകരിച്ചു. കൊച്ചിയില്‍ നിന്നും ഫ്ളൈ നാസ് ആണ് സര്‍വ്വീസ് നടത്തുന്നത്. കേരളത്തില്‍ നിന്നും കുറഞ്ഞ ദിവസത്തേക്കുള്ള ഹജ്ജ് യാത്ര ഒരുക്കുന്ന ഷോര്‍ട്ട് ഹജ്ജും കൊച്ചിയില്‍ നിന്നാണ്. ആദ്യ സര്‍വ്വീസ് കൊച്ചിയില്‍ നിന്നും 2026 ഏപ്രില്‍ 30ന് ഉച്ചക്ക് 2.10ന് പുറപ്പെടും. മെയ് 19 ആണ് അവസാന സര്‍വ്വീസ്. കൊച്ചിയില്‍ നിന്നും ഷോര്‍ട്ട് ഹജ്ജിനായുള്ള ഫ്ളൈറ്റ് സര്‍വ്വീസുകള്‍ മെയ് 17, 18, 19 തിയ്യതികളിലാണ്.

കണ്ണൂര്‍ എംബാര്‍ക്കേഷന്‍ പോയിന്റില്‍ ഫ്ളൈഅദീല്‍ ആണ് സര്‍വ്വീസ് നടത്തുന്നത്. 348 പേര്‍ക്ക് യാത്രയാകാവുന്ന മൊത്തം 13 സര്‍വ്വീസുകളാണ് കണ്ണൂരില്‍ നിന്നുള്ളത്. കണ്ണൂരില്‍ നിന്നും ആദ്യ സര്‍വ്വീസ് 2026 മെയ് 5ന രാത്രി 11.30നാണ്. അവസാന സര്‍വ്വീസ് മെയ് 14-നാണ്.

കാലിക്കറ്റ് എംബാര്‍ക്കേഷനില്‍ നിന്നും ആകാശ എയറാണ് സര്‍വ്വീസ് നടത്തുന്നത്. ഷെഡ്യൂള്‍ ഇതു വരെ പ്രസിദ്ധീകരിച്ചിട്ടില്ല. കേരളത്തിലെ മൂന്ന് എബാര്‍ക്കേഷനില്‍ നിന്നും സൗദിയിലെ ജിദ്ദയിലേക്കാണ് സര്‍വ്വീസുകള്‍. ഹജ്ജ് കര്‍മ്മങ്ങള്‍ പൂര്‍ത്തീകരിച്ച് മദീന സന്ദര്‍ശനവും നടത്തി മദീനയില്‍ നിന്നുമായിരിക്കും മടക്ക യാത്ര.

ഓണ്‍ലൈന്‍ ഫ്ളൈറ്റ് ബുക്കിംഗ്;-
ഈ വര്‍ഷം മുതല്‍ ഹാജിമാര്‍ക്ക് തന്നെ സ്വന്തം നിലയില്‍ ഫ്ളൈറ്റും, യാത്രാ തിയ്യതിയും തെരഞ്ഞെടുക്കാവുന്ന ഓണ്‍ലൈന്‍ ഫ്ളൈറ്റ് ബുക്കിംഗ് സൗകര്യം ഒരുക്കിയിട്ടുണ്ട്. ഇത് ഓരോ കവറിലെയും യൂസര്‍ ലോഗിനില്‍ ലഭ്യമാണ്. ഹാജിമാര്‍ക്ക് താല്‍പര്യമുള്ള തിയ്യതി ലഭ്യതക്കനുസരിച്ച് തെരഞ്ഞെടുക്കാവുന്നതാണ്. ഈ സൗകര്യം നാല് ദിവസത്തേക്കാണ് ഒരുക്കിയിട്ടുള്ളത്. കൂടുതല്‍ വിവരങ്ങള്‍ക്ക്് സര്‍ക്കുലര്‍ നമ്പര്‍ 29 കാണുക.