കൊണ്ടോട്ടി: കരിപ്പൂര്‍ വിമാനത്താവളത്തില്‍ ഒരിടവേളക്ക് ശേഷം സൗദി എയര്‍ലൈന്‍സ് തിരിച്ചെത്തുന്നു. നാളെ മുതല്‍ റിയാദ്- കോഴിക്കോട് സെക്ടറില്‍ സൗദി എയര്‍ ലൈന്‍സ് സര്‍വീസിന് തുടക്കമാകും. രാവിലെ 8.45 ന് എത്തുന്ന വിമാനം 9.45ന് തിരിച്ച് റിയാദിലേക്ക് പുറപ്പെടും.

തുടക്കത്തില്‍ ശനി, ഞായര്‍, ചൊവ്വ, വ്യാഴം ദിവസങ്ങളിലാണ് സര്‍വീസ്. അടുത്ത മാസം മുതല്‍ ആഴ്ചയില്‍ എല്ലാ ദിവസവും സര്‍വീസ് നടത്താനാകുമെന്ന് എയര്‍ലൈന്‍സ് അധികൃതര്‍ പറഞ്ഞു. 190 പേര്‍ക്ക് യാത്ര ചെയ്യാവുന്ന നിയോ 321 വിമാനമാണ് നാളെയെത്തുന്നത്. നേരത്തേ, 400 പേര്‍ക്ക് യാത്ര ചെയ്യാവുന്ന ബോയിംഗ് കരിപ്പൂരില്‍ സര്‍വീസ് നടത്തിയിരുന്നു.

റണ്‍വേ റീകാര്‍ പെറ്റിംഗിന്റെ പേരില്‍ കൊച്ചിയിലേക്ക് മാറ്റിയ സര്‍വീസിന് പിന്നീട് തിരിച്ചുവരാന്‍ അനുമതി കിട്ടിയില്ല. അതിനു ശേഷം കരിപ്പൂരിലെ വിമാനാപകടത്തെ തുടര്‍ന്ന് വലിയ വിമാനങ്ങള്‍ക്കുള്ള അനുമതി പൂര്‍ണമായും നിഷേധിക്കപ്പെടുകയും ചെയ്തു. പിന്നാലെ, സൗദി എയര്‍ലൈന്‍സ് സര്‍വീസ് പൂര്‍ണമായും നിലക്കുകയായിരുന്നു.