റിയാദ്: സൗദി അറേബ്യയുടെ കായിക ചരിത്രത്തില്‍ പുതിയ അധ്യായമെഴുതി അഞ്ചാമത് റിയാദ് മാരത്തണ്‍ സമാപിച്ചു. 125 രാജ്യങ്ങളില്‍ നിന്നായി 20,000-ത്തിലധികം കായിക പ്രേമികളാണ് ശനിയാഴ്ച പുലര്‍ച്ചെ റിയാദിലെ തെരുവുകളെ ആവേശത്തിലാഴ്ത്തിയത്. അമീറ നൂറ ബിന്ത് അബ്ദുറഹ്‌മാന്‍ യൂണിവേഴ്‌സിറ്റി ക്യാമ്പസ് കേന്ദ്രീകരിച്ചായിരുന്നു മത്സരങ്ങള്‍ നടന്നത്.

സൗദി സ്‌പോര്‍ട്‌സ് ഫോര്‍ ഓള്‍ ഫെഡറേഷന്‍ (SFA) സംഘടിപ്പിച്ച മാരത്തണ്‍ വേള്‍ഡ് അത്‌ലറ്റിക്‌സ് എലൈറ്റ് റോഡ് റേസ് അംഗീകാരത്തോടെയാണ് നടന്നത്. നാല് വിഭാഗങ്ങളിലായാണ് മത്സരങ്ങള്‍ ക്രമീകരിച്ചിരുന്നത്: ഫുള്‍ മാരത്തണ്‍ (42.2 കി.മീ): രാവിലെ 6.25-ന് ആരംഭിച്ച പ്രധാന മത്സരത്തില്‍ പ്രമുഖ അന്താരാഷ്ട്ര താരങ്ങള്‍ പങ്കെടുത്തു. ഹാഫ് മാരത്തണ്‍ (21.1 കി.മീ): പ്രൊഫഷണല്‍ അത്‌ലറ്റുകളുടെ വലിയ നിര തന്നെ ഈ വിഭാഗത്തിലുണ്ടായിരുന്നു. 10 കി.മീ ഓട്ടം: രാവിലെ ഒമ്പതിന് ആരംഭിച്ച ഈ മത്സരത്തില്‍ മികച്ച പങ്കാളിത്തമാണ് രേഖപ്പെടുത്തിയത്. ഫണ്‍ റണ്‍ (5 കി.മീ): കുടുംബങ്ങള്‍ക്കും കുട്ടികള്‍ക്കുമായി ഒരുക്കിയ ഈ വിഭാഗം ആവേശകരമായ ജനപങ്കാളിത്തം കൊണ്ട് ശ്രദ്ധേയമായി.

മത്സരത്തോടനുബന്ധിച്ച് നാല് ദിവസമായി പ്രവര്‍ത്തിച്ചിരുന്ന 'മാരത്തണ്‍ വില്ലേജ്' ശനിയാഴ്ച ഉച്ചയ്ക്ക് മൂന്ന് മണിയോടെ സമാപിച്ചു. സംഗീത പരിപാടികള്‍, ഫിറ്റ്നസ് ക്ലാസുകള്‍, വിവിധയിനം ഭക്ഷണ സ്റ്റാളുകള്‍ എന്നിവയാല്‍ വില്ലേജ് സജീവമായിരുന്നു. മെട്രോ സര്‍വീസുകള്‍ ഉപയോഗപ്പെടുത്തിയാണ് ഭൂരിഭാഗം പേരും മത്സരസ്ഥലത്തേക്ക് എത്തിയത്.

സമ്മാനദാനവും ഫലപ്രഖ്യാപനവും
മത്സരത്തിന്റെ വിശദമായ ഫലങ്ങള്‍ ഇന്ന് (ഞായറാഴ്ച) www.riyadhmarathon.org എന്ന ഔദ്യോഗിക വെബ്സൈറ്റില്‍ പ്രസിദ്ധീകരിക്കും. സൗദി അറേബ്യയുടെ 'വിഷന്‍ 2030'-ന്റെ ഭാഗമായി കായിക മേഖലയിലുണ്ടായ വലിയ മുന്നേറ്റത്തിന്റെ അടയാളമായി മാറുകയാണ് ഈ വര്‍ഷത്തെ മാരത്തണ്‍.