റിയാദ്- 2025ല്‍ സൗദി അറേബ്യയുടെ സാമ്പത്തിക രംഗത്ത് വന്‍ കുതിച്ചുചാട്ടമെന്ന് ഏറ്റവും പുതിയ കണക്കുകള്‍ സൂചിപ്പിക്കുന്നു. ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് പുറത്തുവിട്ട ഏറ്റവും പുതിയ കണക്കുകള്‍ പ്രകാരം, രാജ്യത്തിന്റെ മൊത്ത ആഭ്യന്തര ഉല്‍പ്പാദനത്തില്‍ മുന്‍വര്‍ഷത്തെ അപേക്ഷിച്ച് 4.5% വളര്‍ച്ച രേഖപ്പെടുത്തി.

2025-ല്‍ രേഖപ്പെടുത്തിയ 4.5% വളര്‍ച്ചയില്‍ ഏറ്റവും വലിയ പങ്കുവഹിച്ചത് എണ്ണ മേഖലയാണ്. വിവിധ മേഖലകളിലെ വളര്‍ച്ചാ നിരക്ക് ഇപ്രകാരമാണ്:

* എണ്ണ മേഖല - 5.6% വളര്‍ച്ച

* എണ്ണയിതര മേഖല - 4.9% വളര്‍ച്ച

* സര്‍ക്കാര്‍ സേവനങ്ങള്‍ - 0.9% വളര്‍ച്ച

2025ന്റെ അവസാന മൂന്ന് മാസങ്ങളില്‍ (ഒക്ടോബര്‍ - ഡിസംബര്‍) രാജ്യം കൈവരിച്ചത് 4.9% വളര്‍ച്ചയാണ്. ഇതില്‍ എണ്ണ മേഖല മാത്രം 10.4% എന്ന ശ്രദ്ധേയമായ വളര്‍ച്ച രേഖപ്പെടുത്തി. അതേസമയം എണ്ണയിതര മേഖല 4.1% വളര്‍ച്ച കൈവരിച്ചപ്പോള്‍ സര്‍ക്കാര്‍ സേവനങ്ങളില്‍ 1.2% ഇടിവുണ്ടായി.

മൊത്തം വാര്‍ഷിക വളര്‍ച്ചയില്‍ എണ്ണയിതര മേഖല 2.7 ശതമാനവും എണ്ണ മേഖല 1.4 ശതമാനവും സംഭാവന നല്‍കി. 2025-ന്റെ മൂന്നാം പാദത്തെ അപേക്ഷിച്ച് നാലാം പാദത്തില്‍ ജിഡിപിയില്‍ 1.1% വര്‍ദ്ധനവ് രേഖപ്പെടുത്തിയിട്ടുണ്ട്.