ജിദ്ദ: എട്ടാമത് അന്താരാഷ്ട്ര അറബിക് ഭാഷാ-സാഹിത്യ സമ്മേളനത്തിന് ജിദ്ദ വേദിയാകുന്നു. 'ഭാഷ: വിനിമയത്തില്‍ നിന്ന് ജ്ഞാന നവീകരണത്തിലേക്കും സാഹിത്യ സര്‍ഗ്ഗാത്മകതയിലേക്കും' എന്ന പ്രമേയത്തില്‍ ഫെബ്രുവരി 6 മുതല്‍ 8 വരെയാണ് സമ്മേളനം നടക്കുന്നത്.

അറബിക് ഭാഷയുടെയും സാഹിത്യത്തിന്റെയും വികാസം, ഗവേഷണം, അക്കാദമിക് രംഗത്തെ അറിവുകളുടെ കൈമാറ്റം എന്നിവ ലക്ഷ്യമിട്ടാണ് സംഘാടക സമിതി ഈ പരിപാടി ഒരുക്കിയിരിക്കുന്നത്. സൗദി അറേബ്യയില്‍ നിന്നും വിദേശത്തു നിന്നുമുള്ള പ്രമുഖ പണ്ഡിതന്മാരും ഗവേഷകരും സമ്മേളനത്തില്‍ പങ്കെടുക്കും.

അറബിക് ഭാഷയുടെയും സാഹിത്യത്തിന്റെയും ആധുനിക വികാസം, ഡിജിറ്റല്‍ പരിവര്‍ത്തന കാലഘട്ടത്തിലെ ഭാഷാ പഠനസാധ്യതകള്‍, വൈവിധ്യമാര്‍ന്ന ഗവേഷണ പ്രബന്ധങ്ങളുടെ അവതരണം എന്നിവയാണ് പ്രധാന ചര്‍ച്ചാ വിഷയങ്ങള്‍.

അറബിക് ഭാഷാ പഠന രംഗത്ത് പുതിയ വാതായനങ്ങള്‍ തുറക്കുന്നതിനും വിജ്ഞാന വ്യാപനത്തിനും ഈ സമ്മേളനം വഴിയൊരുക്കുമെന്ന് സംഘാടകര്‍ അറിയിച്ചു. താല്‍പ്പര്യമുള്ളവര്‍ക്ക് ഔദ്യോഗിക വെബ്സൈറ്റായ kefeac.org/conferences/21 വഴി രജിസ്റ്റര്‍ ചെയ്യാവുന്നതാണ്.