അല്‍ അഹ്‌സ: ഹൃദയാഘാതത്തെ തുടര്‍ന്ന് അല്‍ ഹസ്സ മുബാറസ് അല്‍ ഉബൈദ് ഹോസ്പിറ്റലില്‍ ഇന്നലെ നിര്യാതനായ റോയി വര്‍ഗീസിന്റെ ഭൗതിക ശരീരം എംബസി ഉദ്യോഗസ്ഥരുടെയും പോലീസ് അധികൃതരുടെയും നിര്‍ലോഭമായ സഹകരണത്തോടെ നടപടിക്രമങ്ങള്‍ പൂര്‍ത്തിയാക്കി വെള്ളിയാഴ്ച ഡല്‍ഹിയില്‍ എത്തിച്ചു സംസ്‌കരിക്കും.

അല്‍ ഹസ്സ ഒ ഐ സി സി മെമ്പറും, അല്‍ ഹസ്സ മാര്‍ത്തോമ കോണ്‍ഗ്രിഗേഷന്‍ അല്‍ അഹ്‌സ ട്രസ്റ്റിയുമായ റോയി വര്‍ഗ്ഗീസ് ജീവകാരുണ്യ സാമൂഹിക സേവന രംഗത്ത് ഏറെ തല്‍പരനും, നിറസാന്നിദ്ധ്യവുമായിരുന്നു. പവര്‍വെല്‍ ഇന്റര്‍നാഷണല്‍ കമ്പനി ജീവനക്കായിരുന്നു.

വെള്ളിയാഴ്ച പുലര്‍ച്ചെ 01:25 നുള്ള ദമ്മാം - ഡല്‍ഹി എയര്‍ ഇന്ത്യ വിമാനത്തില്‍ ഡല്‍ഹിയിലെത്തുന്ന മൃതദേഹം, അവിടെനിന്നും ഉച്ചയ്ക്ക് ശേഷം 03:20ന് അഹമ്മദാബാദ് വിമാനത്താവളത്തിലെത്തുകയും അവിടെ മാര്‍ത്തോമ്മ ജറുസലേം ചര്‍ച്ച് സെമിത്തേരിയില്‍ സംസ്‌കരിക്കുകയും ചെയ്യുമെന്ന് ബന്ധുക്കള്‍ അറിയിച്ചു. മൃതദേഹത്തെ ഉബൈദ് ഹോസ്പിറ്റലില്‍ നഴ്‌സ് കൂടിയായ ഭാര്യ ആനി റോയി അനുഗമിക്കും.
പ്രമുഖ സാമൂഹ്യ പ്രവര്‍ത്തകനും,ഒ ഐ സി സി സൗദി നാഷണല്‍ കമ്മിറ്റി ജനറല്‍ സെക്രട്ടറിയുമായ പ്രസാദ് കരുനാഗപ്പളളി നടപടിക്രമങ്ങള്‍ക്കു നേതൃത്വം നല്‍കി. റോയി വര്‍ഗ്ഗീസിന്റെ അകാല വിയോഗത്തില്‍ ഒ ഐ സി സി അല്‍ അഹ്‌സ അനുശോചിച്ചു.