ദുബായ്: യുഎഇയിലെ ബിഗ് ടിക്കറ്റ് സീരീസ് 283 നറുക്കെടുപ്പില്‍ രണ്ട് ഇന്ത്യന്‍ പ്രവാസികള്‍ക്ക് ഓരോ ദശലക്ഷം ദിര്‍ഹം (ഏകദേശം 2.25 കോടി രൂപ) വീതം സമ്മാനം ലഭിച്ചു. വര്‍ഷങ്ങളായി ഭാഗ്യം പരീക്ഷിച്ചുവരുന്ന ഇവര്‍ക്ക് ജീവിതം തന്നെ മാറ്റിമറിക്കുന്ന നേട്ടമാണ് കൈവന്നിരിക്കുന്നത്.


51 കാരനായ സന്തോഷ് ജിമ്മിലായിരുന്ന സമയത്താണ് ബിഗ് ടിക്കറ്റില്‍ നിന്നുള്ള അറിയിപ്പ് വന്നത്. അപരിചിതമായ നമ്പറില്‍ നിന്നുള്ള കോള്‍ കണ്ടപ്പോള്‍ അതൊരു തമാശ ആയിരിക്കുമെന്നാണ് അദ്ദേഹം ആദ്യം കരുതിയത്.

1999-ല്‍ ഭോപ്പാലില്‍ നിന്നും അബുദാബിയിലെത്തിയ ഇദ്ദേഹം കഴിഞ്ഞ അഞ്ച് വര്‍ഷമായി ബിഗ് ടിക്കറ്റ് എടുത്തു വരികയായിരുന്നു. ഗ്രൂപ്പായി ടിക്കറ്റ് എടുക്കുന്നതിന് പകരം വിശേഷ അവസരങ്ങളില്‍ ഒറ്റയ്ക്ക് ടിക്കറ്റ് എടുക്കുന്നതായിരുന്നു സന്തോഷിന്റെ ശീലം.

'വാര്‍ത്ത വിശ്വസിക്കാനായില്ല. എന്റെ മകളോട് ഓണ്‍ലൈനില്‍ പരിശോധിച്ച് ഉറപ്പുവരുത്താന്‍ പറഞ്ഞ ശേഷമാണ് എനിക്ക് ആശ്വാസമായത്,' അദ്ദേഹം പറഞ്ഞു.

ലഭിച്ച തുക ഉപയോഗിച്ച് വസ്തുവകകളില്‍ നിക്ഷേപം നടത്താനും ദീര്‍ഘകാല സാമ്പത്തിക ആസൂത്രണം ചെയ്യാനുമാണ് സന്തോഷ് കുമാര്‍ ഇപ്പോള്‍ ലക്ഷ്യമിടുന്നത്.

ജനുവരി 8-ന് എടുത്ത 148955 എന്ന നമ്പറിലുള്ള ടിക്കറ്റിലൂടെയാണ് ജെന്‍സി റൂബ എന്ന ഇന്ത്യന്‍ പ്രവാസിക്ക് ഒരു ദശലക്ഷം ദിര്‍ഹം ഭാഗ്യം തേടിയെത്തിയത്. വര്‍ഷത്തിന്റെ തുടക്കത്തില്‍ തന്നെ ഇത്തരമൊരു വലിയ നേട്ടം സ്വന്തമാക്കാന്‍ കഴിഞ്ഞതിലുള്ള സന്തോഷം അവര്‍ പങ്കുവെച്ചു.

ഫെബ്രുവരി മാസത്തിലും വന്‍ സമ്മാനങ്ങളാണ് ബിഗ് ടിക്കറ്റ് ഒരുക്കിയിരിക്കുന്നത്:

മാര്‍ച്ച് 3: 15 ദശലക്ഷം ദിര്‍ഹത്തിന്റെ ബമ്പര്‍ നറുക്കെടുപ്പ്.

ആശ്വാസ സമ്മാനങ്ങള്‍: അഞ്ച് പേര്‍ക്ക് ഒരു ലക്ഷം ദിര്‍ഹം വീതം ലഭിക്കും.

പ്രതിവാര നറുക്കെടുപ്പുകള്‍: ഫെബ്രുവരിയില്‍ ഓരോ ആഴ്ചയും നാല് വിജയികള്‍ക്ക് 50,000 ദിര്‍ഹം വീതം നല്‍കും.